Ajit Pawar – राज्याचे उपमुख्यमंत्री अजित पवार यांच्या अपघाती निधनाची बातमी हिंजवडी आयटी परिसरात कळताच संपूर्ण आयटी परिसरासह मुळशी तालुका शोकसागरात बुडाला. विकासाचे व्हिजन घेऊन भल्या पहाटे हिंजवडी परिसराचे दौरे करणाऱ्या अजितदादांना अखेरची श्रध्दांजली वाहण्यासाठी मुळशीतील सर्वपक्षीय नेत्यांनी हिंजवडीच्या छत्रपती शिवाजी महाराज चौकात मोठी गर्दी केली होती.

यावेळी अजित पवार यांच्या प्रतिमेला पुष्पहार अर्पण करून सर्वपक्षीय नेत्यांनी श्रद्धांजली अर्पण केली.यावेळी जिल्हा नियोजन समितीचे माजी सदस्य संतोष साखरे, माजी सरपंच शामराव हुलावळे, भाजपाचे उमेदवार शिवाजी बुचडे, राष्ट्रवादीचे उमेदवार सागर साखरे, शिवसेना ( उबाठा) उमेदवार नागेश साखरे व दिलीप हुलावळे यांनी आपल्या दुःखद भावना व्यक्त करत श्रद्धांजली अर्पण केली.

याप्रसंगी युवा नेते सुरेश हुलावळे, सरपंच गणेश जांभुळकर, उपसरपंच दीपाली जांभुळकर, माजी सरपंच दत्तात्रय साखरे, बाळासाहेब भिंताडे, गणपत जगताप, संदीप जाधव, कृष्णा बुचडे, विक्रम साखरे, शिवनाथ जांभुळकर, प्रदीप साखरे, प्रवीण जांभुळकर, मयूर साखरे,गणेश बोरकर, विश्वास जांभुळकर, शरद जांभुळकर, कुंडलिक जांभुळकर , नेरे गावच्या पोलीस पाटील दीपाली जाधव, यांच्यासह हिंजवडी ग्रामपंचायतचे पदाधिकारी व सर्वपक्षीय कार्यकर्ते नेते तसेच ग्रामस्थ मोठ्या संख्येने उपस्थित होते.

पुणे जिल्ह्याचे पालकमंत्री असलेल्या अजित पवार यांनी हिंजवडी आयटी परिसरातील गंभीर वाहतूक समस्येसह अन्य समस्या सोडविण्यासाठी पुढाकार घेतला होता. येथील प्रस्तावित आणि पर्यायी रस्त्यांच्या विकासासाठी ते आग्रही होते. हिंजवडीसारख्या मोठ्या शहरी आणि आयटी परिसरातही सकाळपासून दादांच्या रोखठोक भूमिका व कार्यकुशल नेतृवाबाबत चौकाचौकात चर्चा सुरू होत्या. अनेकांनी आपली दुकाने व व्यावसाय बंद ठेवून दादांना श्रद्धांजली वाहिली. तर आयटीयन्ससह अनेक ग्रामस्थ व कार्यकर्त्यांमध्ये दु:खद भावना व हळहळ व्यक्त होत होती.