प्रभात वृत्तसेवा
पुणे – पुणे जिल्ह्याला प्रगती, सुसंस्कृतपणा आणि कार्यतत्परतेची मोठी परंपरा आहे. या परंपरेचा अभिमान बाळगून, प्रशासकीय सेवेत दाखल झालेल्या उमेदवारांनी सचोटी आणि निष्ठेचा वारसा पुढे न्यावा, असे आवाहन राज्याचे उपमुख्यमंत्री तथा जिल्ह्याचे पालकमंत्री अजित पवार यांनी केले.जिल्हास्तरीय रोजगार मेळाव्यात विविध पदांवर नियुक्ती मिळालेल्या ७७१ उमेदवारांना दूरदृश्य प्रणालीद्वारे संबोधित करताना ते बोलत होते. जिल्हाधिकारी कार्यालयात आयोजित या कार्यक्रमात अनुकंपा तत्त्वावरील आणि महाराष्ट्र लोकसेवा आयोगामार्फत लिपिक-टंकलेखक म्हणून निवड झालेल्या उमेदवारांना नियुक्तीपत्रांचे वाटप करण्यात आले.

यावेळी नगरविकास राज्यमंत्री माधुरी मिसाळ, आमदार भीमराव तापकीर, बापूसाहेब पठारे, विभागीय आयुक्त डॉ. चंद्रकांत पुलकुंडवार, प्रभारी जिल्हाधिकारी गजानन पाटील यांच्यासह प्रशासनातील वरिष्ठ अधिकारी उपस्थित होते.उपमुख्यमंत्री पवार म्हणाले की, आजचा दिवस तुमच्या आयुष्यातील स्वप्नपूर्तीचा आहे. अनुकंपा तत्त्वावर नोकरी मिळालेल्या उमेदवारांनी कुटुंबाचा आधारस्तंभ बनून आपल्या प्रियजनांची स्वप्ने पूर्ण करावीत. तर, एमपीएससी परीक्षेत गुणवत्तेच्या जोरावर यश मिळवलेल्या तरुणांनी हे केवळ पहिले पाऊल मानून पुढील प्रगतीसाठी अभ्यास सुरू ठेवावा.

शासकीय सेवेत लिपिक संवर्ग हा प्रशासनाचा कणा असून, नागरिकांना शासनाच्या योजनांचा लाभ मिळवून देण्याची मोठी जबाबदारी या पदावर असल्याचेही त्यांनी नमूद केले.दरम्यान, या मेळाव्यात पुणे जिल्ह्यातील एकूण ७७१ उमेदवारांना ६५ विविध आस्थापनांमध्ये नियुक्ती देण्यात आली. यामध्ये एमपीएससी मार्फत निवड झालेल्या ३७२, अनुकंपा तत्त्वावर गट क मधील १५५ आणि गट ड मधील २४४ उमेदवारांचा समावेश आहे. कार्यक्रमात मान्यवरांच्या हस्ते प्रातिनिधिक स्वरूपात २२ उमेदवारांना नियुक्तीपत्रांचे वाटप करण्यात आले.