Ajinkya Rahane Retirement Emotional Letter Parents Radhika Dhopavkar Insta Story Viral : भारतीय क्रिकेट संघाचा अनुभवी आणि भरवशाचा फलंदाज अजिंक्य रहाणेने आंतरराष्ट्रीय क्रिकेटमधून निवृत्ती जाहीर केल्यानंतर क्रीडा जगतातून त्याच्यावर शुभेच्छांचा वर्षाव होत आहे. सचिन तेंडुलकर, विराट कोहली आणि रोहित शर्मा या दिग्गजांनी त्याच्यासोबतच्या आठवणींना उजाळा दिला आहे. अशातच आता अजिंक्य रहाणेची पत्नी राधिका धोपावकर हिने शेअर केलेली एक इन्स्टाग्राम स्टोरी सोशल मीडियावर प्रचंड व्हायरल होत असून, तिने अजिंक्यच्या आई-वडिलांनी आपल्या मुलासाठी लिहिलेले एक अत्यंत स्पर्श करणारे आणि भावूक पत्र शेअर केले आहे.

“तुझा निवृत्तीचा फोन मन हेलावून गेला!”

अजिंक्यच्या आई-वडिलांनी या पत्रात त्याच्या सुरुवातीच्या दिवसांपासून ते निवृत्तीच्या फोनपर्यंतचा संपूर्ण प्रवास उलगडला आहे. पत्रात त्यांनी लिहिले, “तुझा निवृत्तीचा फोन मन हेलावून गेला. १९९६-९७ मध्ये तुला डोंबिवलीच्या रेल्वे मैदानावर दाखल केल्यापासूनचा प्रवास डोळ्यांसमोर उभा राहिला. कोणत्याही सुविधा किंवा पाठिंबा नसतानाही तुझी इथपर्यंतची वाटचाल थक्क करणारी होती. अनेक चढ-उतार आले, पण तू खचला नाहीस; उलट तावून-सुलाखून निघालास आणि देशाचे यशस्वी नेतृत्व केलेस.”

“जगाने गोडवे गायले नसले तरी तूच आमचा हिरो!”

Mummy-Pappa yaar 🥺💜 pic.twitter.com/NGF6hvJ30o

— KolkataKnightRiders (@KKRiders) July 31, 2026

आई-वडिलांनी पत्रात पुढे लिहिले की, “तुझ्यामुळेच आम्हाला समाजात वेगळी ओळख मिळाली. आमच्या लेखी तुझ्या यशापयशाच्या गोळाबेरजेपेक्षा तुझा साधेपणा, जमिनीवर असणे, खेळाशी अन् देशाशी असलेला प्रामाणिकपणा आणि तुझे निष्कलंक क्रिकेट हेच महत्त्वाचे आहे. जगाने जरी तुझे जास्त गोडवे गायले नसले तरीही तूच आमचा खरा हिरो आहेस. हितचिंतक, प्रशिक्षक आणि सहकाऱ्यांचे ऋण तुझ्यावर कायम असू दे.”

हेही वाचा – Ashwin WC Team : वनडे विश्वचषकासाठी अश्विनने निवडला भारतीय संघ! रोहित-विराटला स्थान, पण ‘या’ स्टार खेळाडूंना वगळलं

आयुष्याचे दुसरे पर्व सुरू होत असताना, “कायम तुझे कल्याण इच्छिणारे तुझे ममी-पापा, यशस्वी भव…” अशा शब्दांत त्यांनी पत्राचा भावूक शेवट केला. राधिकाने शेअर केलेले हे पत्र सध्या क्रिकेट चाहत्यांच्या डोळ्यात पाणी आणत आहे