बीड : बीड जिल्ह्यातील गुन्हेगारी विश्वात वाल्मिक कराडच्या टोळीची पुन्हा एकदा दहशत निर्माण होत असताना दिसत आहे. कराडच्या जवळचा सहकारी ज्ञानोबा उर्फ गोट्या गित्ते याचे अघोरी कृत्य समोर आल्याने मोठी खळबळ उडाली आहे. परळीतील व्यापारी महादेव मुंडे यांच्या हत्येप्रकरणातील संशयित आरोपी गोट्या गित्तेचा एक व्हिडिओ सोशल मीडियावर व्हायरल झाला आहे, ज्यामध्ये तो रात्रीच्या अंधारात ‘राम नाम सत्य है’ म्हणत कोणाच्यातरी घरासमोर नैवेद्य ठेवताना दिसत आहे. हा प्रकार तो आपल्या वैर धरलेल्या व्यक्तींच्या घरासमोर करत असल्याचा दावा केला जात आहे. इतकेच नव्हे, तर गोट्या गित्तेचे हातात बंदूक घेतलेले व्हिडिओही आता व्हायरल होत असून, प्रशासन यावर काय कारवाई करते, याकडे सर्वांचे लक्ष लागले आहे. गोट्या गित्तेचे अघोरी कृत्य व्हायरल व्हिडिओमध्ये गोट्या गित्ते रात्रीच्या अंधारात ‘राम नाम सत्य है’ म्हणत घरासमोर नैवेद्य ठेवताना दिसत आहे. हा प्रकार बापू आंधळे खून प्रकरणातील फरार आरोपी बबन गित्ते याच्या घराबाहेर घडल्याचे सांगितले जात आहे. असं कृत्य करून गोट्या गित्ते मानसिक दबाव निर्माण करण्याचा प्रयत्न करत असल्याची चर्चा आहे. याशिवाय, त्याच्या हातात बंदूक घेऊन दहशत पसरवणारे व्हिडिओही सोशल मीडियावर व्हायरल झाले आहेत. गोट्या गित्ते हा बीडमधील गुन्हेगारी विश्वाचा मोठा चेहरा असून, त्याच्यावर परळी, परभणी, लातूर, बीड आणि पिंपरी-चिंचवड येथे अनेक गुन्हे दाखल आहेत. तो महाराष्ट्रभर बंदुका पुरवणारा सराईत गुन्हेगार असल्याचा आरोप आहे. महादेव मुंडे यांच्या हत्येप्रकरणाने बीड जिल्ह्यात खळबळ माजवली आहे. 19 ऑक्टोबर 2023 रोजी परळी येथील व्यापारी महादेव मुंडे यांचे अपहरण झाले आणि तीन दिवसांनंतर त्यांचा मृतदेह आढळला. या प्रकरणात वाल्मिक कराड, त्याचा मुलगा श्री कराड आणि गोट्या गित्ते यांच्यासह काही जणांनी मुंडे यांची क्रूरपणे हत्या केल्याचा आरोप आहे. 12 गुंठे जमिनीवर कराडच्या मुलाची नजर वाल्मिक कराडचे माजी सहकारी बाळा बांगर यांनी पत्रकार परिषदेत धक्कादायक खुलासा केला की, मुंडे यांच्या गळ्याजवळचा मांसाचा तुकडा कापून तो वाल्मिक कराडच्या समोर टेबलवर ठेवण्यात आला होता. पोस्टमार्टेम अहवालातही याला पुष्टी मिळाली आहे. या हत्येचा उद्देश 12 गुंठे जमिनीच्या वादाशी संबंधित असल्याचे सांगितले जाते, ज्यावर कराडच्या मुलाची नजर होती. महादेव मुंडे यांच्या पत्नी ज्ञानेश्वरी मुंडे यांनी न्यायासाठी आंदोलन केले आणि पोलिसांना अल्टिमेटम देत विषप्राशनाचा प्रयत्न केला. त्यांनी मुख्य आरोपींना अटक न झाल्याबद्दल तीव्र नाराजी व्यक्त केली आहे. बाळा बांगर यांनीही वाल्मिक कराड आणि त्याच्या टोळीवर गंभीर आरोप केले असून, या प्रकरणात विशेष तपास पथक (SIT) मध्ये आयपीएस अधिकाऱ्याची नियुक्ती करण्याची मागणी केली आहे.
