मुंबई – माजी मंत्री, आमदार हसन मुश्रीफ यांच्या घरावर सकाळी सहा वाजल्यापासून छापेमारी सुरु असल्याची माहिती समोर येत आहे. आज सकाळी 6 वाजल्यापासून ईडीकडून छापेमारी सुरु करण्यात आली आहे. अप्पासाहेब नलावडे साखर कारखान्याप्रकरणी ईडी आणि आयकर विभागाने ही धाड मारली आहे. त्यामुळे राष्ट्रवादी काँग्रेसमध्ये एकच खळबळ उडाली आहे. भाजप नेते किरीट सोमय्या यांनी याबाबत पहिली प्रतिक्रिया दिली. या छापेमारीचे सोमय्या यांनी स्वागत केले आहे. एका मराठी वृत्त वाहिनीशी बोलताना सोमय्या यांनी मुश्रीफ यांच्यावर सुरु असलेल्या छापेमारीबाबत भाष्य केले. हिसाब तर होणारच असं म्हणत मुश्रीफ यांनी आपल्याच जावयाला कोट्यावधीचे कॉन्ट्रॅक्ट दिल्याचे आरोप सोमय्या यांनी यावेळी केले. तसेच यावेळी सोमय्या यांनी काँग्रेस नेते अस्लम शेख यांचं देखील नाव घेत इशारा दिला. उद्धव ठाकरे यांच्या सर्व घोटाळेबाज मंत्र्यांचे घोटाळे बाहेर काढणार…पुढे अस्लम शेख यांनी देखील तयारी करून ठेवावी असा सूचक विधान सोमय्या यांनी वुत्तवाहिनीशी बोलताना केलं. हसन मुश्रीफ यांच्यावर गेल्या काही दिवसांपासून भाजप नेते किरीट सोमय्या यांनी आरोपांची मालिका सुरू केली होती. सातत्याने त्यांच्यावर ईडीची छापे पडणार असल्याचे वक्तव्य सोमय्या यांनी केले होते. त्यामुळे ते चांगलेच अडचणीत आले होते. सोमय्या यांनी कारखाना कार्यस्थळावर भेट दिली होती. दरम्यान, मिळालेल्या माहितीनुसार, हसन मुश्रीफ यांच्या कागलमधील घरावर तसेच पुणे येथील कार्यालयांवर छापे पडल्याची माहितीदेखील समोर समोर आली आहे. तसेच यानंतर आता सोमय्या यांनी केलेल्या विधानानुसार त्यांच्या रडारवर अस्लम शेख असल्याचे समजते.
