Sharad Pawar : राष्ट्रवादी काँग्रेस (शरद पवार गट) अध्यक्ष शरद पवार यांच्या प्रकृतीबाबत पुन्हा एकदा चर्चा सुरू झाली आहे. काही दिवसांपूर्वी पुण्यातील रुबी हॉल क्लिनिकमध्ये उपचार घेतल्यानंतर आता त्यांना मुंबईतील ब्रीच कँडी रुग्णालयात दाखल करण्यात आलं आहे. ही माहिती समोर येताच राजकीय वर्तुळात तसेच कार्यकर्त्यांमध्ये चिंतेचं वातावरण निर्माण झालं आहे.

मात्र, प्राथमिक माहितीनुसार शरद पवार यांच्या प्रकृतीत कोणतीही गंभीर समस्या नसून त्यांना केवळ नियमित वैद्यकीय तपासणीसाठी रुग्णालयात दाखल करण्यात आलं आहे. वाढतं वय, सततचे दौरे आणि राजकीय-सामाजिक कार्यक्रमांमधील व्यस्त दिनक्रम लक्षात घेता डॉक्टरांनी काही आवश्यक आरोग्य तपासण्या करण्याचा सल्ला दिला होता. त्यानुसार सध्या डॉक्टरांच्या देखरेखीखाली त्यांच्या विविध चाचण्या सुरू आहेत.

शरद पवार रुग्णालयात दाखल झाल्याची बातमी समोर आल्यानंतर सोशल मीडियावर त्यांच्या प्रकृतीबाबत उलट सुलट चर्चा सुरू झाल्या आहेत. काही ठिकाणी त्यांची प्रकृती गंभीर असल्याचे दावेही करण्यात आले. मात्र डॉक्टरांनी आणि राष्ट्रवादी काँग्रेसकडून या सर्व अफवा फेटाळून लावत पवारांची प्रकृती स्थिर आणि चांगली असल्याचं स्पष्ट करण्यात आलं आहे.

राष्ट्रवादी काँग्रेसकडून कार्यकर्त्यांना अफवांवर विश्वास न ठेवण्याचं आवाहन करण्यात आलं आहे. रुटीन चेकअप पूर्ण झाल्यानंतर शरद पवारांना डिस्चार्ज दिला जाणार असल्याची माहितीही पक्षाकडून देण्यात आली.

नियमित तपासणीसाठी रुग्णालयात  (Sharad Pawar)

 

दरम्यान, एप्रिल महिन्यात दिल्ली दौऱ्यावरून परतल्यानंतरही शरद पवार यांची प्रकृती अचानक बिघडली होती. त्यावेळी त्यांना काही दिवस रुग्णालयात उपचार घ्यावे लागले होते. डॉक्टरांनी त्यांना विश्रांतीचा सल्ला दिल्यानंतर ते आरोग्याची विशेष काळजी घेत आहेत. सध्याही त्यांना केवळ नियमित तपासणीसाठी रुग्णालयात दाखल करण्यात आल्याचं डॉक्टरांनी स्पष्ट केलं आहे.

हेही वाचा : Salad: आजरांना दूर ठेवायच आहे? सॅलेड ठरतेय फिटनेससाठी सुपरफूड!