NCP Meeting : प्रफुल्ल पटेल गैरहजर, तटकरेंनी व्यक्त केली खंत; सुनेत्रा पवार म्हणाल्या…. राष्ट्रवादीच्या बैठकीत नेमकं काय-काय घडलं?
NCP Meeting : या बैठकीला पक्षातील ज्येष्ठ नेते उपस्थित होते. सुनील तटकरे यांना बोलताना मंत्री छगन भुजबळ यांनी थांबवले असल्याची माहिती मिळत आहे.
NCP Meeting : महायुतीचा घटक पक्ष असलेला राष्ट्रवादी काँग्रेस पक्ष अजित पवार यांच्या निधनानंतर अंतर्गत राजकारणामुळे चर्चेत आहे. अजित पवार यांच्या विमान अपघातानंतर सुनेत्रा पवार यांच्याकडे पक्षाची सर्व सूत्र गेली आहेत. त्या पक्षाच्या राष्ट्रीय अध्यक्ष आहेत. तसेच त्यांचे दोन्ही पुत्र पार्थ पवार आणि जय पवार यांच्यावरही मोठी जबाबदारी सोपविण्यात आली आहे. यातून पक्षावर वर्चस्व प्रस्थापित करण्याचा प्रयत्न केला जात असल्याचे बोलले जात आहे.
दुसरीकडे पक्षातील ज्येष्ठ नेते सुनील तटकरे आणि प्रफुल्ल पटेल यांना साईडलाईन केल्याची चर्चा आहे. या सगळ्या घडामोडींची चर्चा गेल्या काही दिवसांपासून सुरू असतानाच उपमुख्यमंत्री सुनेत्रा पवार यांच्या उपस्थितीत काल (26 मे) मंगळवार राष्ट्रवादी काँग्रेस पक्षाची अत्यंत महत्वाची बैठक पार पडली. या बैठकीला पक्षातील ज्येष्ठ नेते उपस्थित होते. सुनील तटकरे यांना बोलताना मंत्री छगन भुजबळ यांनी थांबवले असल्याची माहिती मिळत आहे.
Sunetra Pawar NCP
तसेच प्रफुल्ल पटेल यांनी पक्षाच्या बैठकीला दांडी मारल्याने विविध चर्चांना उधाण मिळाले आहे. सुत्रांच्या माहितीनुसार, बैठकीत सुनील तटकरे यांनी त्यांच्यावर आणि प्रफुल्ल पटेल यांच्यावर सातत्यानं होणाऱ्या टीकेबाबत नाराजी व्यक्त केली. तसेच पक्षातील कुणीही आमच्या बाजूनं उभं राहत नसल्याची खंत बोलून दाखवली.
सुनील तटकरे मुद्दे मांडत असताना मंत्री छगन भुजबळ यांनी त्यांना थांबवण्याचा प्रयत्न केला. मात्र स्पष्टता येण्यासाठी आपण बोलणारच असल्याचं सुनील तटकरेंनी छगन भुजबळांना सांगितल्याची माहिती आहे.
विशेष म्हणजे सुनील तटकरेंच्या भाषणापूर्वीच पार्थ पवार बैठकीतून निघून गेल्याची माहिती समोर आली. त्यामुळे पक्षातील अंतर्गत मतभेद असल्याची चर्चा रंगली आहे. प्रफुल्ल पटेल यांच्या गैरहजेरीनंतर नाराजीच्या चर्चा रंगल्या असतानाच छगन भुजबळांनी सुनील तटकरे आणि आपल्यात कोणताही वाद नसल्याचं स्पष्ट करत अफवा न पसरवण्याचं आवाहन केलं आहे.
बैठकीत या पाच गोष्टी घडल्या?
१ प्रफुल्ल पटेलांची बैठकीला दांडी
२ सुनील तटकरेंच्या बोलण्याआधीच पार्थ पवार बैठकीतून निघून गेले
३ सुनील तटकरे छगन भुजबळ यांच्यात वाद
४ 10 जून पक्षाचा स्थापना मेळावा कुठं घ्यायचा यावरून मतमतांतरं
५ सुनेत्रा पवारांनी व्यक्त केली खंत
सुनेत्रा पवारांनी दिल्या सूचना
या बैठकीत पक्षाची बदनामी करणाऱ्यांना सडेतोड उत्तर द्या आणि पक्ष एकसंध असल्याचा संदेश जनतेपर्यंत पोहोचवा, अशा सूचना राष्ट्रवादी काँग्रेसच्या अध्यक्षा सुनेत्रा पवार यांनी वरिष्ठ नेत्यांना दिल्या. तसंच पक्षात फूट पडणार असल्याच्या चर्चांवर त्यांनी नाराजी व्यक्त केली.
तसेच सुनील तटकरे आणि प्रफुल्ल पटेल यांच्या पदांबाबत निर्माण झालेल्या संभ्रमावरही त्यांनी सारवासारव करत, पक्षात ज्येष्ठ नेत्यांचा योग्य सन्मान राखला जाईल, असं स्पष्ट केलं.
या नेत्यांवर पक्षाची भूमिका मांडण्याची जबाबदारी
माध्यमांमध्ये पक्षाची भूमिका मांडण्याची जबाबदारी प्रदेशाध्यक्ष खासदार सुनील तटकरे, ज्येष्ठ नेते प्रकाश सोळंके, अन्न व नागरी पुरवठा मंत्री छगन भुजबळ, अनिल पाटील यांच्यावर सोपविण्यात आली असल्याची माहिती आहे.
