पुष्पा २ सिनेमाची जादू बॅाक्स अॅाफिसवर अजूनही कायम आहे. या सिनेमाने आतापर्यंतच्या अनेक सिनेमांचे रेकार्ड मोडले आहेत. पुष्पा २ सिनेमातील कलाकारांना देखील सिनेमाने लोकप्रियता मिळवून दिली आहे. या सिनेमात असलेले ‘किसिग’ नावाच्या गाण्यावर अभिनेत्री श्रीलीलाने केलेला डान्स काळजाचा ठोका चुकवणार होता. आता श्रीलीलाला बॅालीवूडमधील हिंदी सिनेमात अभिनय करण्याची अॅाफर आली आहे. लवकरच या सिनेमाची अधिकृतरित्या घोषणा करण्यात येणार आहे.

मिळालेल्या माहितीनुसार, धर्मा या निर्मिती संस्थेकडून “तू मेरी मैं तेरा, मै तेरा तू मेरी” या नावाचा सिनेमा तयार करण्यात येणार आहे. क्रिसमसच्या दिवशी या सिनेमाच्या नावाची घोषणा या सिनेमात मुख्य भूमिकेत असलेल्या कार्तिक आर्यनने त्याच्या सोशल मीडिया अकाऊंटवरून केली होती. या नव्या प्रोजेक्टचा भाग अभिनेत्री श्रीलीला असणार आहे. तिने या सिनेमात काम करण्याची तयारी दर्शवली असून लवकरच या सिनेमावर काम करण्यात येणार आहे. तर हा सिनेमा २०२६ मध्ये रिलीज करण्यात येणार असल्याचे सांगितले जात आहे.

या सिनेमाचे दिग्दर्शन राष्ट्रीय पारितोषिक विजेते दिग्दर्शक समीर विद्वांस हे करणार आहेत. याअगोदर विद्वांस यांनी कार्तिक आर्यनसोबत सत्यपूरम प्रेम कथा नावाचा सिनेमा केला होता. अभिनेत्री श्रीलीलाने आपल्या करिअरची सुरुवात ‘चित्रांगदा’ या चित्रपटातून बालकलाकार म्हणून केली. त्यानंतर अभिनय आणि डान्स कौशल्य असल्याने तिला प्रेक्षकांची विशेष पसंती मिळाली. आता ती बॅालीवूड इंडस्ट्रीमध्ये येण्यासाठी सज्ज झाली आहे.