निवृत्त न्यायाधीश अभय शिरसीकर : कसबा पेठेत मार्गदर्शक व समुपदेशन केंद्राचे उद्‌घाटन
Abhay Shirsikar: न्यायालयात दाखल होणारे अनेक वाद परस्पर संवाद, योग्य मार्गदर्शन आणि समंजसपणातून न्यायालयाबाहेरही सोडविता येऊ शकतात. न्यायालयात जाण्यापूर्वीच परस्पर संमतीने वाद मिटविण्याचा प्रयत्न करावा, असे आवाहन निवृत्त जिल्हा न्यायाधीश अभय शिरसीकर यांनी केले.

कायदेविषयक मार्गदर्शन व समुपदेशन केंद्राच्या उद्घाटनप्रसंगी शिरसीकर बोलत होते. यावेळी महाराष्ट्र राज्य सहकारी बँकेचे मुख्य प्रशासक ॲड. बाळासाहेब अनास्कर प्रमुख पाहुणे म्हणून उपस्थित होते.

न्यायव्यवस्थेवरील कामाच्या वाढत्या ताणाकडे लक्ष वेधून शिरसीकर म्हणाले की, न्यायालयीन प्रक्रियेमध्ये अनेक टप्पे असल्यामुळे प्रकरणांचा निकाल लागण्यास वेळ लागतो. त्यामुळे न्यायालयीन प्रक्रियेपूर्वीच संवाद, मध्यस्थी आणि परस्पर संमतीच्या माध्यमातून वाद मिटविले पाहिजेत.

ॲड. बाळासाहेब अनास्कर यांनी कायदेविषयक जागरूकतेचा महत्त्वपूर्ण मुद्दा मांडला. ते म्हणाले की, समाजातील अनेक नागरिकांपर्यंत कायद्याचे ज्ञान पोहोचत नाही. त्यामुळे अनेकांना हक्क, कायदेशीर तरतुदी तसेच उपलब्ध कायदेशीर उपायांविषयी पुरेशी माहितीच नसते. त्यामुळे कायदा असूनही त्याचा योग्य उपयोग कसा करून घ्यावा, याबाबत नागरिक अनभिज्ञ राहतात.

या केंद्राच्या माध्यमातून कायद्याचे ज्ञान समाजातील सर्वसामान्य आणि गरजू घटकांपर्यंत पोहोचावे. ॲड. चंद्रशेखर घाटे यांच्या या उपक्रमाचे कौतुक यावेळी करण्यात आले. प्रास्ताविकात ॲड. चंद्रशेखर घाटे यांनी गरजू नागरिकांना कायदेविषयक मदत उपलब्ध करून देण्याबरोबरच नवोदित वकिलांना स्वतःचे चेंबर आणि कामासाठी योग्य व्यासपीठ मिळावे, यासाठीही प्रयत्नशील असल्याचे सांगितले.

समारोपात डॉ. स्मिता प्रकाश जोशी यांनी विविध सामाजिक संस्था, ज्येष्ठ वकील, समुपदेशक आणि सामाजिक क्षेत्रातील व्यक्तींनी या उपक्रमात सहभागी होण्याचे आवाहन केले. सूत्रसंचालन समुपदेशक स्मिता लाड यांनी केले.

कोठे आहे हे केंद्र…
शहर परिसरातील नागरिकांसाठी कायदेविषयक मार्गदर्शन व समुपदेशन केंद्र द चेंबर्स, सातवा मजला, पवळे चौक, कसबा पेठ येथे सुरू करण्यात आले आहे.