Aaditya Thackeray : राज्यातील २६५ तालुक्यांमध्ये दुष्काळ जाहीर करण्यात आला असून, आता राज्य सरकारने दुष्काळ निवारण उपाययोजनांच्या अंमलबजावणीवर लक्ष केंद्रित करावे आणि प्रत्येक बाधित शेतकऱ्यापर्यंत मदत पोहोचेल याची खात्री करावी, असे प्रतिपादन शिवसेना (ठाकरे) नेते आदित्य ठाकरे (Aaditya Thackeray) यांनी शनिवारी केले.

ठाकरे यांनी शनिवारी राज्यातील दुष्काळग्रस्त भागांचा दोन दिवसांचा दौरा सुरू केला. त्यांनी सर्वप्रथम सोलापूर आणि त्यानंतर धाराशिव व लातूर जिल्ह्यांना भेट दिली. ते नांदेड, हिंगोली, परभणी, जालना आणि छत्रपती संभाजीनगर या जिल्ह्यांनाही (Aaditya Thackeray) भेट देणार आहेत. धाराशिव जिल्ह्यातील तुळजापूर तालुक्यातील खानापूर गावात नुकसानग्रस्त पिकांची पाहणी केल्यानंतर ते पत्रकारांशी बोलत होते.

ठाकरे म्हणाले, सरकारने दुष्काळाची घोषणा यापूर्वीच करायला हवी होती. सरकारने शनिवारी दुष्काळ जाहीर केला. तसेच पीक कर्जाचे पुनर्गठन, जमीन महसुलात सवलत आणि कृषी-संबंधित कर्जांच्या वसुलीस स्थगिती यांसारख्या दिलासादायक उपाययोजनांची घोषणा केली.

शुक्रवारी उशिरा जारी करण्यात आलेल्या सरकारी निर्णयानुसार, या निर्णयाचा विस्तार राज्याच्या ७५ टक्के क्षेत्रावर आहे. दुष्काळग्रस्त तालुके प्रामुख्याने सोलापूर, अहिल्यानगर, नाशिक, लातूर, बीड, बुलढाणा, अमरावती, यवतमाळ, नागपूर आणि चंद्रपूर या जिल्ह्यांमधील आहेत. दुष्काळ जाहीर करण्यास विलंब झाला असो किंवा तो कधी जाहीर करायला हवा होता. आम्ही सातत्याने दुष्काळ लवकर जाहीर करण्याची मागणी करत होतो. महाराष्ट्राच्या आधी कर्नाटकने दुष्काळ जाहीर केला होता, असे ठाकरेंनी सांगितले.

तथापि, आता सर्व लक्ष दुष्काळ निवारण उपाययोजनांच्या अंमलबजावणीवर केंद्रित केले पाहिजे. आता दुष्काळ जाहीर झाला आहे, तेव्हा सरकारने हे सुनिश्चित केले पाहिजे की, दुष्काळ निवारणाच्या संपूर्ण पॅकेजअंतर्गत मिळणारी मदत प्रत्येक शेतकऱ्यापर्यंत पोहोचेल. सध्याच्या कोरड्या हवामानाचा किंवा दुष्काळी परिस्थितीचा परिणाम केवळ कृषी क्षेत्रापुरता मर्यादित राहणार नाही.

या दुष्काळाचा किंवा सुपर एल निनोचा परिणाम शहरी भागांवरही होईल. याचा फटका संपूर्ण महाराष्ट्राला आणि देशाला बसेल. या परिस्थितीचे व्यापक परिणाम हाताळण्यासाठी केंद्र आणि राज्यांनी समन्वयाने पावले उचलली पाहिजेत, असे आवाहन ठाकरे (Aaditya Thackeray) यांनी केले.