Kangana Ranaut – मुंबई उच्च न्यायालयाने अभिनेत्री कंगना रणौतच्या आगामी ‘क्वीन फुल पॉवर’ या चित्रपटाला मोठा दिलासा दिला आहे. न्यायालयाने या चित्रपटाच्या प्रदर्शनावर किंवा निर्मितीवर तात्काळ अंतरिम बंदी घालण्यास स्पष्ट नकार दिला आहे. २०१४ मध्ये रिलीज झालेल्या हिट क्वीन या चित्रपटाशी या नव्या सिनेमाचे कोणतेही साम्य किंवा संबंध नसल्याचे न्यायालयाने म्हटले आहे.

न्यायालयाने आपल्या आदेशात स्पष्ट केले की, २०१४ चा क्वीन चित्रपट आणि हा नवीन चित्रपट यांच्या कथा, कथानक आणि विषय पूर्णपणे वेगळे आहेत. हा आगामी चित्रपट २०१४ च्या चित्रपटाचा सिक्वेल, प्रिक्वेल, स्पिन-ऑफ किंवा रिबूट नाही.

फँटम स्टुडिओने जुलै महिन्यात उच्च न्यायालयात धाव घेत जिओस्टार इंडिया प्रायव्हेट लिमिटेडविरोधात कायदेशीर कारवाई केली होती. क्वीन चित्रपटाच्या करारानुसार, भविष्यात कोणताही सिक्वेल किंवा प्रिक्वेल बनवल्यास त्यावर दोन्ही पक्षांचे ५० टक्के अधिकार राहतील, असा दावा फँटम स्टुडिओने केला होता.

तसेच, आमच्या परवानगीशिवाय कोणत्याही कृती किंवा रूपांतरणास मंजुरी दिली नसल्याचे सांगत स्टुडिओने २५० कोटी रुपयांच्या नुकसानीची मागणी केली होती. दुसरीकडे, जिओस्टारने हा दावा फेटाळून लावत क्वीन फुल पॉवर हा एक पूर्णपणे स्वतंत्र आणि नवीन चित्रपट असल्याचे न्यायालयात सांगितले.

क्वीन हा शब्द अनेक चित्रपटांच्या नावांमध्ये वापरला जातो, त्यामुळे या शब्दावर कोणीही मालकी हक्क सांगू शकत नाही आणि या नावामुळे प्रेक्षकांमध्ये कोणताही गोंधळ उडणार नाही, असे न्यायालयाने नमूद केले.