Priyanshu Kshatriya – नागराज मंजुळे दिग्दर्शित झुंड या हिंदी चित्रपटातील कलाकार प्रियांशू क्षत्रिय उर्फ बाबू छत्री याची हत्या झाल्याची धक्कादायक घटना घडली आहे. या चित्रपटात त्याने बाबू छत्री ही भूमिका साकारली होती. प्रियांशू क्षत्रिय याची नागपूरमध्ये जरीपटका भागात हत्या झाली आहे. प्रियांशूचा मित्र ध्रुव साहू यानेच त्याचा खून केला आहे. दोघांमध्ये दारुच्या नशेत वाद झाला होता. त्यावेळी, ध्रुव साहू याने प्रियांशूवर धारदार शस्त्राने वार करुन त्याला जखमी केले. या हल्ल्यानंतर बाबू छत्री याला तातडीने रुग्णालयात नेण्यात आले. मात्र, डॉक्टरांनी त्याला मृत घोषित केले. यानंतर पोलिसांनी ध्रुव साहू याला अटक केली आहे. बाबू छत्री याच्यावर यापूर्वीही गुन्हे दाखल असल्याची माहिती समोर आली आहे. त्याला झुंड चित्रपटात काम मिळाल्याने त्यावेळी अनेकांनी आश्चर्य व्यक्त केले होते.
