Purushottam Jagtap : सोमेश्वर सहकारी साखर कारखान्याच्या निवडणुकीच्या पार्श्वभूमीवर बारामती तालुक्यातील राजकीय वातावरण तापले आहे. निवडणुकीत स्वतंत्र भूमिका घेतल्याच्या कारणावरून राष्ट्रवादी काँग्रेसच्या अजित पवार गटाने पुरुषोत्तम जगताप यांच्यासह त्यांच्या पॅनलमधील सदस्यांवर कारवाई केली आहे. पक्षाची भूमिका डावलून निवडणुकीत स्वतंत्र पॅनेल उभे करून पक्षालाच आव्हान देण्याचा ठपका ठेवत जगताप यांची पक्षातून हकालपट्टी करण्यात आली आहे.

अजित पवार गटाचा जगताप यांना धक्का

यासंदर्भात अजित पवार यांच्या नेतृत्वाखालील राष्ट्रवादी काँग्रेस पक्षाच्या पत्रकार परिषदेत कारवाईची घोषणा करण्यात आली. पक्षाचे तालुकाध्यक्ष संदीप बांदल यांनी पुरुषोत्तम जगताप यांच्यासह त्यांच्या पॅनलमधील सदस्यांना पक्षातून काढून टाकण्याचा निर्णय जाहीर केला.

यावेळी संदीप बांदल म्हणाले की, माजी चेअरमन आणि पक्षातील काही संचालकांनी पक्षविरोधी भूमिका घेतली आहे. त्यामुळे त्यांच्यावर पक्षातून निलंबित करण्याची कारवाई करण्यात येत आहे.

सोमेश्वर कारखान्याच्या निवडणुकीत तिरंगी लढत

सोमेश्वर सहकारी साखर कारखान्याच्या निवडणुकीत सध्या तीन पॅनल निवडणूक रिंगणात आहेत. पुरुषोत्तम जगताप यांनी स्वतंत्र पॅनल उभे केल्याने निवडणुकीतील राजकीय समीकरणे अधिक रंगतदार झाली आहेत.

या निवडणुकीत अजित पवार यांच्या नेतृत्वाखालील राष्ट्रवादी काँग्रेस, शरद पवार यांच्या नेतृत्वाखालील राष्ट्रवादी काँग्रेस पक्ष (शरदचंद्र पवार) आणि पुरुषोत्तम जगताप व भाजपचे माजी आमदार संजय जगताप यांच्या नेतृत्वाखालील आघाडी यांच्यात लढत होत आहे.

पक्षाच्या कारवाईनंतर जगताप काय भूमिका घेणार?

निवडणुकीच्या तोंडावर झालेल्या या कारवाईमुळे राजकीय वर्तुळात चर्चेला उधाण आले आहे. एकीकडे निवडणुकीतील पॅनलची समीकरणे महत्त्वाची ठरत असताना, दुसरीकडे पक्षाने केलेल्या कारवाईमुळे पुढील राजकीय घडामोडींकडे लक्ष लागले आहे. आता पुरुषोत्तम जगताप या कारवाईवर काय प्रतिक्रिया देतात आणि निवडणुकीत त्यांची पुढील रणनीती काय असणार, याकडे सर्वांचे लक्ष लागले आहे.

Cardiac Arrest: कार्डियाक अरेस्ट म्हणजे काय? हार्ट अटॅकपेक्षा कसा वेगळा? जाणून घ्या लक्षणं, कारणं आणि जीव वाचवण्यासाठी काय करावं!