Sharad Pawar : राज्यातील राजकीय घडामोडींना पुन्हा एकदा वेग आला असून राष्ट्रवादी काँग्रेस (अजित पवार गट) चे ज्येष्ठ नेते आणि माजी गृहमंत्री दिलीप वळसे पाटील यांनी राष्ट्रवादी काँग्रेस (शरदचंद्र पवार) पक्षाचे अध्यक्ष शरद पवार यांची मुंबईतील ‘सिल्व्हर ओक’ या निवासस्थानी भेट घेतली. या भेटीचा फोटो समोर आल्यानंतर राजकीय वर्तुळात विविध चर्चांना उधाण आले आहे.

विधान परिषद निवडणुकीच्या पार्श्वभूमीवर झालेल्या या भेटीला विशेष महत्त्व प्राप्त झाले आहे. भेटीदरम्यान नेमकी कोणती चर्चा झाली याबाबत अधिकृत माहिती समोर आलेली नसली, तरी राज्यातील विविध ज्वलंत प्रश्नांवर दोन्ही नेत्यांमध्ये सविस्तर चर्चा झाल्याची माहिती मिळत आहे.

माध्यमांतील वृत्तानुसार, राज्यातील कांदा उत्पादक शेतकऱ्यांच्या समस्या, सहकार क्षेत्रातील घडामोडी, विविध सहकारी संस्थांशी संबंधित प्रश्न तसेच रयत शिक्षण संस्थेच्या कामकाजाशी निगडित मुद्द्यांवर चर्चा झाली. सध्या कांद्याच्या घसरलेल्या दरामुळे शेतकरी अडचणीत सापडले असून विविध शेतकरी संघटना आंदोलनाच्या तयारीत आहेत. या पार्श्वभूमीवर वळसे पाटील यांनी शरद पवार यांची भेट घेतल्याने कृषी व शेतकरी प्रश्नांवरही चर्चा झाल्याचे मानले जात आहे.

हेही वाचा : Lalit Modi : ‘मी छापा टाकेन’,’असं करायची हिंमत करू नकोस’, शशी थरूर यांचा तो फोन, ललित मोदींचा 16 वर्षांनंतर मोठा खुलासा

दरम्यान, गेल्या काही महिन्यांपासून राष्ट्रवादी काँग्रेसच्या दोन्ही गटांच्या संभाव्य एकत्रीकरणाबाबत राजकीय वर्तुळात चर्चा सुरू आहेत. याआधीही राष्ट्रवादी काँग्रेस अजित पवार गटातील अनेक नेत्यांनी शरद पवार यांची भेट घेतली होती. त्यामुळे या भेटीकडे केवळ औपचारिक चर्चा म्हणून न पाहता राजकीय दृष्टिकोनातूनही महत्त्व दिले जात आहे.

मात्र, या भेटीत दोन्ही गटांच्या भविष्यातील राजकीय समीकरणांवर चर्चा झाली का, याबाबत कोणतीही अधिकृत माहिती अद्याप समोर आलेली नाही. विधान परिषद निवडणूक, राज्यातील राजकीय घडामोडी आणि राष्ट्रवादीच्या भविष्यातील भूमिकेच्या पार्श्वभूमीवर वळसे पाटील-शरद पवार भेटीची चर्चा आता राजकीय वर्तुळात रंगू लागली आहे.

हेही वाचा : Weather Update : राज्यावर तुफानी संकट ! पुढील काही तासांत मान्सून धडकणार; ‘या’ जिल्ह्यांना अलर्टचा अंदाज