पुणेः शहरातील ठाकरे गटातील अनेक पदाधिकारी शिवसेना शिंदे गटात प्रवेश करणार असल्याचे सांगितले जात आहे. विधानसभा निवडणुकीत राज्यभरात महाविकास आघाडीला आणि पर्यायाने ठाकरे गटाला अनेक ठिकाणची जागा गमवावी लागली. यातच हडपसर मतदार संघाचे माजी आमदार कट्टर शिवसैनिक महादेव बाबर यांनी उपमुख्यमंत्री एकनाथ शिंदे यांची भेट घेतली असून लवकरच ते त्यांच्या समर्थकांसह शिवसेनेत जाहीर प्रवेश करणार असल्याचे त्यांनी सांगितले आहे.

यामुळे हा ठाकरे गटाला मोठा धक्का मानला जातो. विधानसभा निवडणुकीत हडपसर मतदार संघाची जागा ही शरद पवार यांच्या पक्षाला सुटली. यानंतर बाबर हे नाराज होते. आता त्यांनी उपमुख्यमंत्री एकनाथ शिंदे यांची भेट घेतली आहे. ठाकरे गटाला जय महाराष्ट्र करीत ते आता शिवसेना शिंदे पक्षात प्रवेश करणार आहेत.

२५ माजी सर्वपक्षीय नगरसेवकांना घेऊन शिंदेंच्या पक्षात फ्रेब्रुवारीच्या पहिल्या आठवड्यात बाबर पक्ष प्रवेश करणार आहेत. विधानसभा निवडणुकीनंतर शहरातील ठाकरे गटाची ताकद कमी होत असल्याचे प्रर्कषाने दिसत आहे. नाराज असलेले काही पदाधिकाऱ्यांनी ठाकरेंची साथ सोडून शिंदे शिनेचे शिवबंधन हाती बांधली आहे. विधानसभा निवडणुकीत दारुण पराभव पत्करावा लागल्यानंतर आता राज्यभरात शिवसेना उद्धव बाळासाहेब ठाकरे पक्षाला मोठे धक्के बसत आहेत.

कोण आहेत महादेव बाबर?

महादेव बाबर हे २००९ मध्ये शिवसेनेच्या तिकिटावर हडपसर विधानसभा मतदार संघातून निवडून आले होते. शिवसेनेत उभी फूट पडल्यानंतर बाबर यांनी ठाकरेंना साथ देण्याचे ठरवले. त्यांना विधानसभा निवडणूक लढवायची होती, पण महाविकास आघाडीमध्ये ही जागा शरद पवारांच्या राष्ट्रवादीला सुटली. बाबर यांची हडपसर मतदार संघात चांगली ताकद आहे. त्यांनी ठाकरेंच्या सेनेला दिलेली सोडचिठ्ठी हा ठाकरेंसाठी मोठा धक्का मानला जातो.

आगामी स्थानिक स्वराज्य निवडणुकीच्या पार्श्वभूमीवर ठाकरे गटातील अनेक पदाधिकारी भाजप, राष्ट्रवादी काँग्रेस, शिवसेनेत पक्ष प्रवेश करत आहेत. यातच काँग्रेसचे माजी आमदार रविंद्र धंगेकर यांनी देखील गुरुवारी शिवसेना प्रमुख आणि उपमुख्यमंत्री एकनाथ शिंदे यांची भेट घेतल्याने चर्चांना उधाण प्राप्त झाले आहे. मात्र, ही भेट मतदार संघातील कामांसाठी होती असे माजी आमदार रविंद्र धंगेकर यांच्या वतीने सांगण्यात आले आहे.