कटिहार – बिहारच्या कटिहार बालसुधार गृह व्यवस्थापनाचा घोर निष्काळजीपणा पुन्हा एकदा समोर आला आहे. येथील १२ फूट उंच भिंतीवरून उडी मारून सहा अल्पवयीन किशोरांनी बालसुधार गृहातून पळ काढला आहे. या घटनेनंतर खळबळ उडाली आणि प्रशासनही हादरले आहे.

मिळालेल्या माहितीनुसार, मंगळवारी रात्री २ वाजता भिंतीवरून उडी मारून ६ किशोर पळून गेले. हे प्रकरण उघडकीस येताच जिल्हा प्रशासनाने कारवाई केली. त्यानंतर तीन किशोरांना पकडण्यात आले. दोघांना आणण्याची प्रक्रिया सुरू आहे. एक अजूनही बेपत्ता आहे.

घाईघाईने पळून गेलेल्या तीन अल्पवयीन किशोरांना दांडखोरा स्टेशनच्या आसपास पकडण्यात आले. नाव न सांगण्याच्या अटीवर व्यवस्थापन समितीच्या एका सदस्याने सांगितले की, हा अल्पवयीन किशोर आसाम आणि बेगुसरायचा रहिवासी आहे, ज्याला १५ दिवसांपूर्वी आणण्यात आले होते.

पश्चिम बंगालमधील दार्जिलिंग विधाननगरमध्ये दोन किशोर त्यांच्या पालकांकडे पोहोचले आहेत आणि एक किशोर अजूनही फरार आहे, त्याला पकडण्याचे प्रयत्न सुरू आहेत.

बालसुधार गृहाच्या निष्काळजी व्यवस्थापनाबद्दल प्रश्‍नचिन्ह उपस्थित झाले आहे. येथे रात्रीच्या वेळी केवळ दोनच सुरक्षा रक्षक असतात. त्यांची संख्या वाढवण्याची मागणी बऱ्याच काळापासून केली जात असली तरी अद्याप त्याकडे लक्ष दिले गेलेले नाही.