पुणे – पुणे व पिंपरी चिंचवड शहरांतील 5 हजार 863 सदनिकांसाठी म्हाडाकडे 59 हजार 766 इतके अर्ज आले आहेत, अशी माहिती म्हाडा पुणे विभागाचे मुख्य अधिकारी अशोक पाटील यांनी दिली. दरम्यान, या घरांसाठी दि. 24 नोव्हेंबर रोजी सोडत होणार आहे.

म्हाडा पुणे विभागाने गृहनिर्माण योजनेतील 403 सदनिका, पंतप्रधान आवास योजनेतील 431 सदनिका, 15 टक्के सामाजिक गृहयोजनेतील 344 सदनिका, प्रथम येणाऱ्यास प्रथम प्राधान्य योजनेतील 2 हजार 445 सदनिका आणि 20 टक्के सर्वसमावेशक गृहनिर्माण योजनेअंतर्गत 2 हजार 445 सदनिका अशा एकूण 5 हजार 863 सदनिकांसाठी सोडत जाहीर केली होती.

त्यासाठी दि.5 सप्टेंबर 2023 पासून ऑनलाईन अर्ज भरण्यास सुरुवात झाली. या मुदतीत म्हाडाकडे 77 हजार 280 जणांनी अर्ज केले. त्यापैकी 59 हजार 766 अर्जदारांनीच अनामत रक्कम भरली आहे. त्यामुळे हेच अर्जदार सोडतीसाठी पात्र ठरले आहेत.

सोडतीचे वेळापत्रक

• सोडतीसाठी अर्जाची प्रारुप यादी प्रसिद्ध – 8 नोव्हेंबर
• हरकती नोंदविची मुदत – 11 नोव्हेंबर
• सोडतीसाठी अर्जाची अंतिम यादी प्रसिद्ध- 20 नोव्हेंबर
• सोडत – दि.24 नोव्हेंबर