3 Idiots Sequel : बॉलीवूडचा सुपरहिट आणि आजही लोकांच्या मनात घर करून बसलेला ‘३ इडियट्स’ या चित्रपटाचा सिक्वेल लवकरच प्रेक्षकांच्या भेटीला येणार आहे. तब्बल १७ वर्षांनंतर या लोकप्रिय चित्रपटाचा दुसरा भाग बनणार असल्याची अधिकृत माहिती समोर आली आहे. यातील खास बाब म्हणजे, आमिर खान, करीना कपूर खान, आर. माधवन आणि शर्मन जोशी हीच मूळ स्टारकास्ट सिक्वेलमध्येही दिसणार आहे. रिपोर्टनुसार, ‘३ इडियट्स 2’ची स्क्रिप्ट पूर्णपणे तयार आहे आणि संपूर्ण टीम अत्यंत उत्साहित आहे. चित्रपटाशी जवळून संबंधित सूत्रांनी सांगितलं की, २०२६ पासून या चित्रपटाचं शूटिंग सुरू होणार आहे. कथा कशावर आधारित असेल? मिळालेल्या माहितीनुसार, सिक्वेलची कथा पहिल्या भागानंतर १५ वर्षांनी पुढे नेली जाणार आहे. या कालावधीत रॅंचो, फरहान, राजू आणि प्रिया सगळ्यांच जीवनं वेगवेगळ्या दिशांना वळलेली असतील. पण काही कारणाने ते पुन्हा एकत्र येऊन एका नव्या प्रवासाची सुरुवात होणार आहे. यामुळे त्यांच्या मैत्रीची केमिस्ट्री, त्यांच्यातला विनोद, संघर्ष आणि भावनिक क्षण हे सर्व प्रेक्षकांना पुन्हा एकदा अनुभवता येणार आहे. ‘३ इडियट्स’चा इतिहास २००९ साली प्रदर्शित झालेला ‘३ इडियट्स’ आजही भारतीय सिनेमातील क्लासिक फिल्म मानला जातो. शिक्षणव्यवस्था, विद्यार्थ्यांवरील दबाव, सर्जनशीलतेची गरज या सर्व मुद्द्यांवर त्याने प्रभावी भाष्य केलं होतं. आणि म्हणूनच या चित्रपटाचा सिक्वेल येत असल्याने प्रेक्षकांमध्ये प्रचंड उत्सुकता आहे.
