मुंबई – करोना लसीच्या प्रत्येक डोसमागे खासगी रुग्णालये 250 रुपये आकारू शकतात. राष्ट्रीय आरोग्य प्राधिकरण आणि केंद्रीय आरोग्य सचिवांच्या अध्यक्षतेखाली दूरदृश्‍य प्रणालीद्वारे झालेल्या बैठकीत आणि प्रशिक्षणात ही माहिती देण्यात आली, असे राज्याचे आरोग्य सचिव डॉ. प्रदीप व्यास यांनी सांगितले.

करोनाची लस देणाऱ्या प्रत्येक व्यक्ती आणि प्रत्येक डोस मागे खासगी रुग्णालयांना 100 रुपये सेवा शुल्क आकारता येईल. या शिवाय प्रत्येक व्यक्तीच्या प्रत्येक डोस मागे डोसची किंमत म्हणून 150 रुपये आकारू शकेल. त्यामुळे खासगी रुग्णालयात प्रती व्यक्ती प्रती डोस अडीचशे रुपये आकारण्यात येतील, असे डॉ. व्यास यांनी सांगितले.

ही सोय पुढील आदेश येईपर्यंत कायम असेल, असे केंद्रीय आरोग्य मंत्रालयाच्या अतिरिक्त सचिव वंदना गुरनानी यांनी सांगितले. हे शुल्क सांगून लसीकरण मोहिमेत खासगी रुग्णालयाचा सहभाग वाढवण्याची सूचना राज्य आणि केंद्र शासित प्रदेशांना करण्यात आली आहे, असेही त्यांनी सांगितले.