Elephant attack – छत्तीसगडमधील सूरजपूर जिल्ह्यात एका रानटी हत्तीने ४५ वर्षीय महिलेला चिरडून ठार केल्याची घटना घडली आहे.

या घटनेसह सूरजपूर आणि लगतच्या बलरामपूर जिल्ह्यांत गेल्या सहा ते सात महिन्यांत या एकाच हत्तीच्या हल्ल्यात मृत्युमुखी पडलेल्यांची संख्या १६ वर पोहोचली असल्याची माहिती वनविभागाच्या अधिकाऱ्यांनी गुरुवारी दिली.

कानांवर असलेल्या ठिपक्यांमुळे स्थानिक नागरिकांमध्ये कबरा कान म्हणून ओळखल्या जाणाऱ्या या एकट्या नर हत्तीने दोन्ही जिल्ह्यांत धुमाकूळ घातला आहे.

त्याच्या हालचालींवर लक्ष ठेवण्यासाठी आणि पुढील जीवितहानी टाळण्यासाठी त्याला बेशुद्ध करून रेडिओ कॉलर बसवण्यास वनविभागाने मंजुरी दिली आहे.

वनविभागाच्या अधिकाऱ्याने दिलेल्या माहितीनुसार, ताजी घटना बुधवारी रात्री उशिरा प्रेमनगर परिसरातील उमेश्वरपूर गावात घडली. दिलासो (वय ४५) असे मृत महिलेचे नाव आहे. प्राथमिक माहितीनुसार, रात्री ११ वाजण्याच्या सुमारास परिसरात हत्ती दिसला होता.