Mumbai Crime – पालघर जिल्ह्यातील नायगाव रेल्वे स्थानकावर लोकल ट्रेनमध्ये विनयभंग करून एका २० वर्षीय तरुणीला रेल्वे रुळावर ढकलल्याची अत्यंत संतापजनक घटना समोर आली आहे. या दुर्दैवी घटनेत तरुणीचा डावा हात कापला गेला असून, याप्रकरणी ५३ वर्षीय आरोपीला रेल्वे पोलिसांनी अटक केली आहे.

रेल्वे अधिकाऱ्यांनी गुरुवारी दिलेल्या माहितीनुसार, ४ नोव्हेंबरच्या संध्याकाळी ही धक्कादायक घटना घडली. गंभीर जखमी झालेल्या आणि डावा हात गमावलेल्या तरुणीला तात्काळ वसईच्या जनसेवा रुग्णालयात दाखल करण्यात आले होते. सुरुवातीला हा एक अपघात असल्याचे मानले जात होते.

मात्र, ६ नोव्हेंबर रोजी मुंबईतील एका महापालिका रुग्णालयात नोंदवलेल्या जबाबात पीडित तरुणीने पोलिसांना सांगितले की, ती बोरीवलीहून मुंबईपासून सुमारे ४० किलोमीटर अंतरावर असलेल्या नायगावच्या दिशेने लोकल ट्रेनने प्रवास करत असताना एका अज्ञात व्यक्तीने तिचा विनयभंग केला होता.

ती ट्रेनमधून उतरल्यावर तिने आरोपीला जाब विचारला, तेव्हा त्याने तिला जोरात धक्का दिला. त्यामुळे ती दोन डब्यांच्या मधील रेल्वे रुळावर खाली पडली. या दरम्यान ट्रेन अंगावरून गेल्यामुळे तिचा डावा हात कापला गेला.

या प्रकरणी शासकीय लोहमार्ग पोलिसांनी गुन्हा दाखल केला. तपासादरम्यान, नायगाव पूर्व येथील ५३ वर्षीय रहिवासी असलेला जितेंद्र गिरजप्पा हिर्मुखे या संशयित हल्लेखोराला ९ नोव्हेंबर रोजी अटक करण्यात आली. सध्या आरोपी न्यायालयीन कोठडीत असून पुढील तपास सुरू आहे.