अबुजा – नायजेरियाची राजधानी अबुजा येथे निर्वासन मोहिमेतील मृत आणि जखमी सैनिकांना घेऊन जाणारे हेलिकॉप्टर कोसळून झालेल्या भीषण अपघातात 12 नायजेरियन सुरक्षा कर्मचाऱ्यांना आपला जीव गमवावा लागला. नायजर चुकुबा गावात सशस्त्र डाकूंनी केलेल्या हल्ल्यात जखमी झालेल्या आणि ठार झालेल्या सैनिकांना बाहेर काढण्यासाठी इव्हॅक्‍युएशन मिशन राबविण्यात आले. वास्तविक, ही घटना गेल्या सोमवारची (14 ऑगस्ट) आहे.

नायजेरियन लष्कराचे प्रवक्ते मेजर जनरल एडवर्ड बुबा यांनी गुरुवारी अबुजा येथे पत्रकार परिषदेत दुर्घटनेची पुष्टी केली आहे. त्यांनी सांगितले की, अपघाताच्या वेळी विमानात दोन पायलट आणि दोन क्रू मेंबर्सशिवाय 14 सैनिक आणि 7 जखमी जवान होते. अपघाताच्या कारणाचा तपास सुरू आहे. याशिवाय, अधिकाऱ्यांनी अद्याप इव्हॅक्‍युएशन मिशनचे तपशील किंवा अपघाताबाबत कोणताही मोठा खुलासा करणे बाकी आहे. या दुर्घटनेत कोणी वाचले आहे की नाही, हे अद्याप समजू शकलेले नाही.

तत्पूर्वी, नायजेरियाचे अध्यक्ष बोला टिनुबू यांनी एका निवेदनात सांगितले होते की, हे अधिकारी आणि सैनिक निर्वासन मोहिमेदरम्यान कर्तव्यावर होते. आपल्या प्रिय देशाच्या सेवेसाठी त्यांनी आपले प्राण अर्पण केले. चुकुबा येथे हेलिकॉप्टर क्रॅश होण्यापूर्वी हल्ल्यात मारल्या गेलेल्या सुरक्षा जवानांचे मृतदेह बाहेर काढले जात होते. हेलिकॉप्टर खाली आणता येईल अशी अत्याधुनिक शस्त्रे बंदूकधाऱ्यांकडे होती, असाही दावा केला जात आहे. हेलिकॉप्टरने कादुना एअरफील्डवरून मिन्नासाठी उड्डाण केले होते. परंतु कदुना आणि मिन्ना या दोन्ही कंट्रोल टॉवर्सशी पायलटचा संपर्क तुटला होता.