पुणे  – प्रतिबंधित क्षेत्रातील नागरिकांच्या स्वॅब टेस्टिंगसाठी 108 रुग्णवाहिकेचे नियोजन करण्यात आल्याचे महापालिका आयुक्त शेखर गायकवाड यांनी सांगितले.

करोना विषाणू प्रादुर्भाव प्रतिबंधात्मक उपाययोजनेंतर्गत प्रतिबंधात्मक क्षेत्रातील नागरिकांचे घशातील स्राव घेण्यासाठी अणि या स्वॅबचे तातडीने तपासणी करण्यासाठी जलदरीत्या राष्ट्रीय विषाणू प्रयोगशाळा येथे पाठवणे महत्त्वाचे आहे. शिवाय हा तपासणी अहवाल जलद मागवून अहवालाच्या निर्देशानुसार तातडीने पुढील नियोजन करण्याच्या दृष्टीने येरवडा, भवानी पेठ, शिवाजीनगर-घोले रस्ता, कसबा- विश्रामबागवाडा आणि ढोलेपाटील रस्ता या पाच प्रतिबंधित क्षेत्रांसाठी ही सोय उपलब्ध करून देण्यात आली आहे. स्वॅब तपासणी अहवाल प्राप्त झाल्यानंतर बाधिताला उपचारार्थ नेण्यासाठी स्वॅब केंद्राजवळच ही सुविधा उपलब्ध केली आहे.

…तर संपूर्ण परिसर सील करणार

करोना विषाणू प्रतिबंधात्मक नियोजनासाठी प्रतिबंधात्मक क्षेत्राबाहेर एखादा रुग्ण पॉझिटिव्ह आढळला, तर तो भागही प्रतिबंधित क्षेत्र म्हणून जाहीर करण्यात येईल. हा नागरिकांच्या दृष्टीने आणि विषाणू प्रादुर्भाव नियंत्रित करण्याच्या दृष्टीने नियोजनाचा भाग राहणार आहे. त्यामुळे नागरिकांनी घाबरून जाऊ नये, तसेच चुकीची माहिती आणि अफवा यांच्यावर विश्वास ठेवू नये, गायकवाड यांनी सांगितले.