Hindi language controversy – औषधांच्या पॅकिंगवर हिंदी भाषेचा वापर केल्याने तामिळनाडूमध्ये हिंदीविरोधाला पुन्हा एकदा धार चढली आहे. करूर आणि कोईम्बतूर येथील सरकारी वैद्यकीय महाविद्यालयाच्या रुग्णालयांमध्ये अनेक पाकिटे वापरली जात होती, ज्यावर औषध केव्हा आणि किती प्रमाणात घ्यावे याच्या सूचना तमिळ, इंग्रजीसोबतच हिंदीमध्येही छापलेल्या होत्या. हे प्रकरण उघडकीस आल्यानंतर, रुग्णालय प्रशासनाने या पाकिटांचा वापर थांबवण्याचे आदेश जारी केले.

द्रमुक नेते टीआरबी राजा यांनी करूरमधील एका सरकारी रुग्णालयात वापरल्या जाणाऱ्या औषधांच्या पाकिटांचे फोटो शेअर केले. त्यानंतर त्यांनी विचारले की, तामिळनाडूतील रुग्णालयांमध्येही त्रि-भाषा धोरण लागू केले जात आहे का? आधी करूरमध्ये, आता कोईम्बतूरमध्येही.

करूर मेडिकल कॉलेज हॉस्पिटलच्या डीन, डॉ. एम. भारती मोहन यांच्या म्हणण्यानुसार, रुग्णालय सामान्यतः मदुराई जेलने बनवलेले साधे तपकिरी कव्हर्स वापरते. रुग्णालयाचे फार्मसी या कव्हर्सवर रबर स्टॅम्पने तमिळमध्ये औषधाच्या वेळांची माहिती छापते. कव्हर्सच्या कमतरतेमुळे, डिसेंबर २०२५ मध्ये इरोडमधील एका सहकारी प्रिंटिंग प्रेसकडून कव्हर्स मागवण्यात आले.

रुग्णालयाने कव्हर्सवर कोणतीही भाषा छापण्याची सूचना दिली नव्हती, परंतु प्रिंटिंग प्रेसने मोठ्या आकाराच्या कव्हर्सवर औषधाचे प्रमाण आणि वापराची माहिती छापली. या कव्हर्सवर छापलेली हिंदी त्यावेळी लक्षात आली नाही आणि सोशल मीडियावर हा मुद्दा समोर आल्यानंतर, त्यांचा वापर बंद करण्यात आला. कोयंबतूर मेडिकल कॉलेज हॉस्पिटलमध्येही असेच हिंदी कव्हर्स वापरले जात होते

आरोग्य अधिकाऱ्यांचे स्पष्टीकरण..

आरोग्य अधिकाऱ्यांनी स्पष्ट केले की, छापील आवरणांवर डोसची माहिती देणे ही एक सामान्य प्रथा आहे आणि कोईम्बतूरमध्ये मोठ्या संख्येने स्थलांतरित कामगार आहेत, त्यामुळे अशी माहिती त्यांच्यासाठी उपयुक्त ठरू शकते. तथापि, काही हॉस्पिटल फार्मासिस्टांनी साध्या आवरणाला आक्षेप घेतला आहे.

त्यांचे म्हणणे आहे की, केवळ तमिळ आणि इंग्रजीमध्ये माहिती दिल्यास काही स्थलांतरित कामगारांना डोस समजावून सांगायला अतिरिक्त वेळ लागू शकतो, तर दुसरीकडे हॉस्पिटलमध्ये आधीच कर्मचाऱ्यांची कमतरता आहे. आरोग्य मंत्री के. जी. अरुणराज म्हणाले की, सध्याच्या सरकारने या पाकिटांच्या रचनेत किंवा भाषेत कोणताही बदल केलेला नाही.