Swabhimani Shetkari Sanghatana – ऊसाला प्रतिटन पाच हजार रुपये दर मिळावा, या मागणीसाठी स्वाभिमानी शेतकरी संघटनेच्यावतीने शहापूर फाटा येथे सह्याद्री सहकारी साखर कारखान्याकडे जाणारी ऊस वाहतूक रोखण्यात आली. या आंदोलनामुळे ऊस वाहतूक करणाऱ्या वाहनांच्या लांबच लांब रांगा लागल्या. ऊसदराच्या प्रश्नावर शेतकरी संघटनेने आक्रमक भूमिका घेतली असतानाच, आंदोलन मागे घेण्यासाठी कारखाना प्रशासनानेही चर्चा केली. मात्र, चर्चेतून तोडगा न निघाल्याने आंदोलन सुरूच ठेवण्यात आले.

शेतकरी नेते राजू शेट्टी यांच्या नेतृत्वाखाली स्वाभिमानी शेतकरी संघटनेने ऊसदराच्या प्रश्नासोबतच साखर उद्योगाच्या आर्थिक धोरणांबाबतही केंद्र सरकारकडे मागण्या केल्या आहेत. साखरेचा किमान विक्री दर (एमएसपी) प्रतिकिलो ५० रुपये आणि इथेनॉलचा दर प्रतिलिटर ७० रुपये निश्चित करावा, अशी संघटनेची मागणी आहे. साखर आणि इथेनॉलच्या दरात योग्य सुधारणा झाल्यास साखर उद्योगाला आर्थिक स्थैर्य मिळण्यास मदत होईल आणि त्याचा लाभ ऊस उत्पादक शेतकऱ्यांनाही मिळावा, अशी संघटनेची भूमिका आहे.

यावेळी कराड उत्तरचे तालुकाध्यक्ष प्रमोदसिंह जगदाळे यांनी सह्याद्री कारखाना प्रशासनाच्या भूमिकेबाबत प्रश्न उपस्थित केला. कारखाने सुरु ठेवायचे असतील तर शेतकऱ्यांना प्रतिटन पाच हजार रुपये दर जाहीर करावा आणि त्यानंतर कारखाने सुरू ठेवावेत, अशी मागणी त्यांनी केली. वाढता उत्पादन खर्च, शेतीसाठी लागणारे भांडवल आणि शेतकऱ्यांचे आर्थिक गणित लक्षात घेता अपेक्षित ऊसदर मिळणे आवश्यक असल्याचे त्यांनी सांगितले.

दरम्यान, आंदोलनाची तीव्रता लक्षात घेऊन कारखान्याच्यावतीने कार्यकारी संचालक विश्‍वजित शिंदे आणि संचालक सुनील जगदाळे यांनी आंदोलनकर्त्या शेतकरी प्रतिनिधींशी चर्चा केली. वाहतूक रोखल्याने कारखान्याच्या ऊस वाहतुकीवर परिणाम होत असताना आंदोलन मागे घेण्यासाठी प्रशासनाकडून प्रयत्न करण्यात आले.

मात्र, ऊसदराच्या मागणीवर एकमत न झाल्याने चर्चेतून मार्ग निघू शकला नाही. परिणामी, संघटनेने आंदोलन सुरूच ठेवण्याचा निर्णय घेतला. या आंदोलनात स्वाभिमानी शेतकरी संघटनेचे जिल्हा उपाध्यक्ष दादासाहेब यादव, कराड उत्तरचे तालुकाध्यक्ष प्रमोदसिंह जगदाळे, दिनेश घाडगे यांच्यासह मोठ्या संख्येने शेतकरी व सभासद उपस्थित होते.