Sara Tendulkar: माजी क्रिकेटपटू सचिन तेंडुलकर यांची मुलगी सारा तेंडुलकर सध्या सोशल मीडियावरील एका पोस्टमुळे चर्चेत आली आहे. पापाराझींनी केलेल्या एका व्हिडिओ आणि त्यावरील आक्षेपार्ह कॅप्शनमुळे सारा संतापली असून तिने सोशल मीडियावरूनच त्यांना सुनावले आहे. काही दिवसांपूर्वी अभिनेता सलमान खान देखील पापाराझींवर नाराज झाल्याची चर्चा होती. त्यानंतर आता सारा तेंडुलकरनेही पापाराझींच्या वागण्यावर उघडपणे नाराजी व्यक्त केली आहे. नेमकं काय घडलं? (Sara Tendulkar) एका पापाराझी पेजने सारा तेंडुलकरचा एक व्हिडिओ सोशल मीडियावर शेअर केला होता. या व्हिडिओमध्ये सारा तिच्या भावजयीसोबत विमानतळावर दिसत होती. मात्र हा व्हिडिओ मागून शूट करण्यात आला होता. त्यासोबत वापरण्यात आलेल्या कॅप्शनमुळे सारा चांगलीच संतापली. त्या व्हिडिओवर “मोटी वाली सारा…” असा उल्लेख करण्यात आला होता. हे कॅप्शन साराला खूपच खटकले. त्यानंतर तिने इंस्टाग्राम स्टोरीवर त्या पोस्टचा स्क्रीनशॉट शेअर करत संताप व्यक्त केला. Sara Tendulkar “ही पत्रकारिता नाही” साराने इंस्टाग्राम स्टोरीमध्ये लिहिले, “तुम्ही खूप घाणेरडे आहात. ही पत्रकारिता नाही. आम्हाला एकटे सोडा.” तिच्या या प्रतिक्रियेनंतर सोशल मीडियावर मोठी चर्चा सुरू झाली आहे. अनेक चाहत्यांनी साराला पाठिंबा दिला आहे. कोणाच्याही शरीरावर किंवा दिसण्यावर टिप्पणी करणे चुकीचे असल्याचे अनेकांनी म्हटले आहे. काही सोशल मीडिया युजर्सनी पापाराझींच्या अशा वागणुकीवर टीकाही केली आहे. sara tendulkar ग्लॅमर विश्वाशी साराचा संबंध सारा तेंडुलकर सोशल मीडियावर खूप लोकप्रिय आहे. ती नेहमी वेगवेगळ्या फॅशन लूकमधील फोटो शेअर करत असते. तिची स्टाइल आणि फॅशन सेन्स चाहत्यांना आवडते. मात्र साराने अद्याप अभिनय क्षेत्रात प्रवेश केलेला नाही. बॉलिवूडमध्ये येण्याची तिची कोणतीही अधिकृत घोषणा देखील झालेली नाही. तरीही बॉलिवूडमधील अनेक कलाकारांशी तिची मैत्री आहे आणि ती अनेक पार्टी व कार्यक्रमांमध्ये दिसत असते. त्यामुळे ती कायम चर्चेत असते. या घटनेनंतर पुन्हा एकदा सेलिब्रिटींच्या प्रायव्हसीचा मुद्दा चर्चेत आला आहे. सोशल मीडियावर प्रसिद्धी मिळवण्यासाठी काही पेजेस मर्यादा ओलांडत असल्याची टीका आता जोर धरू लागली आहे.
