Suncity Karvenagar Flyover : सिंहगड रस्त्यावरील वाहतूक कोंडी फोडण्यासाठी राजारामपूल ते फनटाईमपर्यंतचा उड्डाणपूल उभारण्यात आल्यानंतर आता महापालिकेने सनसिटी ते कर्वेनगरला जोडणाऱ्या उड्डाणपुलाच्या कामाला गती दिली आहे. सिंहगड रस्त्यावर महामेट्रो पुढील काही महिन्यांत खडकवासला ते खराडी मेट्रो मार्गाचे काम सुरू करणार आहे. यामुळे सिंहगड रस्त्यावरील संभाव्य वाहतूक कोंडी फोडण्यासाठी महापालिकेने हा पूल पुढील अडीच महिन्यात सुरू करण्याचे नियोजन केल्याची माहिती महापालिकेच्या प्रकल्प विभागाचे प्रमुख दिनकर गोजारे यांनी दिली.

तसेच, या पुलाच्या कामाचा दररोज आढावा घेतला जाणार असल्याचेही त्यांनी सांगितले. महापालिकेने या पुलाचे काम दोन वर्षांपूर्वी सुरू केले असून जवळ जवळ ८० टक्के काम पूर्ण झाले आहे. पूलाच्या दोन्ही बाजूस असलेल्या जोडरस्त्याचे भूसंपादन करण्यासाठी प्रशासनानाने हालचाली सुरू केल्या आहेत. सिंहगड रस्त्यावरून गंगा भागोदय चौकातून येणारी वाहने या पुलावरून थेट कर्वेनगर आणि कर्वे रस्त्याकडे जाणार असून सुमारे तीन ते किलोमीटरचा वाहनांचा वळसा कमी होणार आहे.

त्यामुळे.सिंहगड रस्त्यावर मेट्रोचे काम सुरू करण्यापूर्वी हा पूल झाल्यास धायरी, नांदेड सिटीकडून येणाऱ्या वाहनांना अडथळ्याविना पुढे जाता येणार आहे. त्यामुळे महामेट्रोने हा पूल सुरू झाल्याशिवाय काम सुरू करू नये अशी स्थानिक नागरिकांची मागणी आहे.

कर्वेनगरमध्ये भूसंपादन
हा पूल सुरू झाल्यानंतर या पुलावरून मोठ्या प्रमाणात कर्वेनगरमध्ये वाहने येणार आहे. मात्र, या वाहनांना कर्वे रस्ता तसेच डीपी रस्त्याकडे जाण्यासाठीच्या शिवणे- खराडी रस्त्याचे भूसंपादन अनेक भागात रखडले आहे. परिणामी, हे भूसंपादन झाले नाही तर कर्वेनगर भागात बाॅटलनेक तयार होणार आहे. यामुळे या भागातील वाहतूक वाढणार आहे. त्यामुळे लिंक रस्ते झाल्याशिवाय हा पूल सुरू करू नये, अशी कर्वेनगरमधील स्थानिक नागरिकांची मागणी आहे. त्यामुळे, महापालिकेचा पथ विभाग तसेच शहर अभियंता विभागाकडून तातडीनं या जागा ताब्यात घेण्याची प्रक्रीया सुरू केली आहे.