पीएमपीएमएल कडून नियोजन ; तिकीट दर ५०० रुपये
PMPML: नवरात्रौ उत्सवात पुणे शहर आणि जिल्ह्यातील देवींच्या विविध शक्तीस्थळांच्या दर्शनासाठी पुणे महानगर परिवहन महामंडळाने (पीएमपीएमएल) सुरू केलेल्या पर्यटन बससेवेत दोन विशेष मार्ग नियोजीत केले आहे. या मार्गावर संपूर्ण वातानुकूलित ई-बसेसद्वारे सेवा दिली जाणार असून, ही सेवा शनिवार, रविवार, सार्वजनिक सुट्ट्यांसह भाविकांच्या मागणीनुसार इतर दिवशीही उपलब्ध असेल.

नवरात्र उत्सवासाठी पर्यटन बससेवा मार्ग क्र. १३ या अंतर्गत दोन विशेष नवरात्र बससेवा सुरू राहतील. या दोन्ही बस सकाळी ८:३० वाजता पुणे स्टेशनवरून सुटतील आणि संध्याकाळी ७:०० वाजता पुन्हा परत येतील.

त्यामध्ये पर्यटन बससेवा क्र. १३ (१) ही पुणे स्टेशन, स्वारगेट मार्गे तळजाई माता मंदिर (तळजाई), पद्मावती मंदिर (पद्मावती), तुकाई माता मंदिर (कोंढणपूर), श्रीनाथ म्हस्कोबा जोगेश्वरी माता मंदिर (कोडीत, पुरंदर) आणि यमाई माता मंदिर (शिवरी, पुरंदर) येथे दर्शन घेऊन स्वारगेट मार्गे पुणे स्टेशनला परत येईल.

पर्यटन बससेवा क्र. १३ (२) ही पुणे स्टेशन, स्वारगेट मार्गे महालक्ष्मी मंदिर (सारसबाग), तांबडी जोगेश्वरी मंदिर (बुधवार पेठ), चतुश्रुंगी माता मंदिर (सेनापती बापट रोड), वैष्णवी माता मंदिर (पिंपरी कॅम्प), भवानी माता मंदिर (भवानी पेठ) येथे दर्शन घेऊन स्वारगेट मार्गे पुणे स्टेशनला परत येईल.

या सेवेसाठी प्रति व्यक्ती ५०० रुपये तिकीट दर असून, भाविकांना या प्रवासासाठी आगाऊ तिकीट बुकिंग करणे आवश्यक आहे. बुकिंगसाठी शहरातील प्रमुख आठ पास केंद्रे डेक्कन जिमखाना, पुणे स्टेशन, स्वारगेट, कात्रज, हडपसर गाडीतळ, पुणे मनपा भवन, भोसरी बसस्थानक आणि निगडी यांचा समावेश असल्याचे पीएमपी प्रशासनाने सांगितले.

भाविक आणि पर्यटकांच्या वाढत्या मागणीनुसार पर्यटन बससेवा क्र. ५ आणि १२ मध्ये नवीन स्थळांचा समावेश करण्यात आला आहे. त्यामध्ये बससेवा क्र. ५ मध्ये धायरी गावातील ऐतिहासिक धायरेश्वर मंदिर आणि नांदेड गावातील प्रसिद्ध जाधव वाडा ऐतिहासिक संग्रहालय यांचा समावेश आहे. बससेवा क्र. १२ मध्ये पांडेश्वर-नाझरे रोडवरील पांडवकालीन प्राचीन श्री क्षेत्र पांडेश्वर शिवमंदिर या स्थळाचा समावेश केला आहे.