Jitendra Awhad: राष्ट्रवादी काँग्रेस पक्षाचे (शप) आमदार जितेंद्र आव्हाड यांना दूरध्वनी करून धमकाविणाऱ्या विशाल माधवराव बिच्चेवाड (वय ३९, रा. बारावा मैल, लोणीकंद) याला ताब्यात घेतले असून, याप्रकरणी त्याला नोटीस बजावली असल्याची माहिती लोणीकंद पोलिसांनी दिली.

पोलिसांनी दिलेल्या माहितीनुसार, बिच्चेवाड हा सुरक्षारक्षक असून, त्याने १९ ऑक्टोबर रोजी मध्यरात्री आव्हाड यांना संदेश पाठवून जीवे मारण्याची धमकी दिली. बिच्चेवाडने आव्हाड यांच्या मोबाइल क्रमांकावर संपर्क साधून शिवीगाळ करत तुझ्या घराच्या दारात आलो आहे.

आत सोडायला सांग. तुला गोळ्या घालतो, अशी धमकी दिली. आव्हाड यांनी याबाबत त्वरित ठाणे येथील वर्तकनगर पोलिसांत माहिती देऊन प्रसारमाध्यमांना कळविले.

बिच्चेवाड हा लोणीकंद परिसरात भाडेतत्त्वावर खोली घेऊन राहात असून, दूरचित्रवाहिनीवर आमदार आव्हाड यांना धमकी दिल्याचे वृत्त प्रसारित झाल्यानंतर घरमालकाने ही बातमी पाहून त्याला पोलिसांच्या ताब्यात दिले.