Road Issue – बौर गावातील ब्राह्मणवाडी येथील नागरिकांना अंत्ययात्रेतील प्रवासातही हालअपेष्टा सहन कराव्या लागत आहेत. ब्राह्मणवाडी ते स्मशानभूमीपर्यंत जाण्यासाठी व्यवस्थित रस्ता नसल्याने पावसाळ्यात चिखलातून अंत्ययात्रा न्यावी लागत आहे. त्यामुळे मृत व्यक्तीला अखेरचा निरोप देण्यासाठी जाणाऱ्या नातेवाईक आणि ग्रामस्थांची मोठी गैरसोय होत आहे.

सध्या परिसरात पावसाची संततधार सुरू असल्याने स्मशानभूमीकडे जाणारा मार्ग पूर्णपणे चिखलमय झाला आहे. अंत्ययात्रेदरम्यान नागरिकांचे पाय चिखलात रुतत आहेत. मृतदेह नेण्यासाठी तसेच अंत्यविधीसाठी आवश्यक लाकूड, साहित्य आणि इतर वस्तू स्मशानभूमीपर्यंत घेऊन जाणेही कठीण होत आहे. अनेकदा चप्पल-बूट काढून चिखलातून वाट काढत स्मशानभूमी गाठण्याची वेळ ग्रामस्थांवर येत आहे.

मृत व्यक्तीला शेवटचा निरोप देताना तरी सन्मानाने जाता यावे, ही प्रत्येकाची अपेक्षा असते. मात्र ब्राह्मणवाडीतील नागरिकांना या अंतिम प्रवासातही चिखल आणि गैरसोयींचा सामना करावा लागत आहे. त्यामुळे ग्रामस्थांमध्ये तीव्र नाराजी व्यक्त होत आहे. स्मशानभूमीकडे जाणारा मार्ग अरुंद आणि खराब असल्याने पावसाळ्यात परिस्थिती अधिक बिकट होते. चिखलामुळे पाय घसरण्याचा धोका निर्माण होतो. विशेषतः ज्येष्ठ नागरिकांना या मार्गावरून चालणे कठीण जाते.

त्यामुळे अंत्ययात्रेत सहभागी होणाऱ्या नागरिकांना सावधपणे पावले टाकत पुढे जावे लागते. अंत्यविधीच्या वेळी आवश्यक साहित्य नेण्यासाठीही अडचणी निर्माण होतात. वाहन स्मशानभूमीपर्यंत पोहोचत नसल्यामुळे दुःखाच्या प्रसंगीही ग्रामस्थांची मोठी धावपळ होते. स्मशानभूमीकडे जाणाऱ्या रस्त्याचा प्रश्न अनेक वर्षांपासून कायम असल्याची ग्रामस्थांची तक्रार आहे. संबंधित विभाग आणि स्थानिक प्रतिनिधींच्या निदर्शनास हा प्रश्न आणूनही कायमस्वरूपी तोडगा निघालेला नसल्याचे नागरिकांचे म्हणणे आहे.