West Bengal Assembly Election – पश्चिम बंगालमधील भाजपचा भव्य विजय हा पक्षाच्या विचारसरणीला आता तेथील लोकांमध्ये मान्यता मिळाली असल्याचे दर्शवतो. आणि हे सत्तांतर या राज्याच्या विकासाचा मार्ग प्रशस्त करेल, असा विश्‍वास केंद्रीय मंत्री नितीन गडकरी यांनी शनिवारी व्यक्त केला.

पश्चिम बंगालचे मुख्यमंत्री सुवेंदू अधिकारी यांच्या शपथविधी समारंभाला उपस्थित राहण्यासाठी रवाना होण्यापूर्वी गडकरी यांनी माध्यमांशी संवाद साधला.

यावेळी गडकरी म्हणाले, पश्चिम बंगालमध्ये पहिल्यांदाच मिळालेला भाजपचा हा भव्य विजय भारतीय जनसंघाचे संस्थापक डॉ. श्यामाप्रसाद मुखर्जी यांना वाहिलेली एक आदरांजली आहे.

मुखर्जी यांनी अत्यंत प्रतिकूल परिस्थितीत भारतीय जनसंघाची स्थापना केली होती. आज बंगालमध्ये आमच्या विचारसरणीला मान्यता मिळाली आहे. यामुळे आमच्या सर्व कार्यकर्त्यांना असीम आनंद झाला आहे.

बंगालच्या जनतेने घडवून आणलेले हे सत्तांतर, भविष्यात राज्याच्या विकासासाठी निःसंशयपणे अत्यंत उपयुक्त ठरेल, असे त्यांनी नमूद केले.

भवानीपूर विधानसभा मतदारसंघात टीएमसीच्या प्रमुख ममता बॅनर्जी यांचा पराभव करणारे सुवेंदू अधिकारी यांनी शनिवारी पश्चिम बंगालचे पहिले भाजप मुख्यमंत्री म्हणून शपथ घेतली.

२०११ मध्ये टीएमसी सत्तेवर येण्यापूर्वी भारतीय कम्युनिस्ट पक्षाच्या (मार्क्सवादी) नेतृत्वाखालील डाव्या आघाडीने सलग ३४ वर्षे या राज्यावर राज्य केले होते.