प्रभात वृत्तसेवा न्हावरे – सध्या सगळीकडे स्थानिक स्वराज्य संस्थेच्या निवडणुकीची रणधुमाळी सुरू असून शिरूर ग्रामीण-न्हावरे जिल्हा परिषद गटात जिल्हा परिषदेसाठी नागरिकांचा मागास प्रवर्ग महिला (ओबीसी) आरक्षण निश्चित झाल्याने स्थानिक राजकारणात खळबळ निर्माण झाली असून अनेक इच्छुक पुरुषांच्या मनसुब्यावर पाणी फिरले आहे. परंतु, अनेक इच्छुकांनी स्वतःच्या पत्नीला उमेदवारी मिळावी यासाठी जीवाचे रान केले आहे. जिल्हा परिषद गटातील गावांतील महिलांमध्ये राजकारणात पुढे येण्याची स्पर्धा दिसून येत असून, राजकीय पक्षांनीही आपल्या गणिताची मांडणी नव्याने सुरू केली आहे. गेल्या काही वर्षांत या मतदारसंघात पुरूष उमेदवारांचे वर्चस्व राहिले असले, तरी आता महिला नेतृत्वाला संधी मिळणार असल्याचे दिसून येते आहे.राजकारणात सक्रिय असलेल्या अनेक महिला नेत्यांची नावे चर्चेत असून, सामाजिक कार्य, महिला बचत गट, तसेच स्थानिक संस्थांमधील महिला कार्यकर्त्यांवर पक्षांची नजर असल्याचे समजते. त्यामुळे शिरूर ग्रामीण-न्हावरे गटातील गावांमध्ये कोणाला तिकीट मिळणार…? हा प्रश्न औत्सुक्याचा झाला आहे. जानकारांच्या मते.. या आरक्षणामुळे स्थानिक राजकारणात मोठा बदल घडू शकतो. तसेच महिला सक्षमीकरणाला चालना मिळेल, पण त्याचबरोबर सत्ताधारी गट आणि विरोधक दोघांनाही रणनीती बदलावी लागेल. थोडक्यात, न्हावरे जिल्हा परिषद गटात इतर मागास प्रवर्ग महिला आरक्षणामुळे नवीन राजकीय समीकरणे उदयास येणार आहेत. यांना उमेदवारी मिळणारा… राष्ट्रवादी काँग्रेस (अजित पवार गट) यांच्याकडुन माजी जिल्हा परिषद सदस्य राजेंद्र जगदाळे पाटील यांच्या पत्नी कविता जगदाळे, राजेंद्र कोरेकर यांच्या पत्नी सारिका कोरेकर, गणेश रोडे यांच्या पत्नी जयश्री रोडे, राष्ट्रवादीच्या महिला प्रदेश संघटक सचिव तृप्ती सरोदे या सर्व महिला राष्ट्रवादी काँग्रेस पक्षातून निवडणूक लढविण्यास इच्छुक आहेत. तसेच भारतीय जनता पक्षातून माजी आमदार लोकनेते स्व. बाबुराव पाचर्णे यांच्या कुटुंबातील महिलेला उमेदवारी मिळू शकते. तसेच जय मल्हार क्रांती संघटनेचे संस्थापक अध्यक्ष दौलत शितोळे यांच्या पत्नी पुजा शितोळे या सुद्धा भारतीय जनता पक्षाचे तिकीट मिळाल्यास निवडणुक लढविण्यास इच्छुक आहेत. राष्ट्रवादी विरुद्ध भाजपा अशीच लढत होणार.. माजी जिल्हा परिषद सदस्य राजेंद्र जगदाळे पाटील यांच्या पत्नी कविता जगदाळे पाटील करडे गावच्या चार वर्षे सरपंच होत्या. तसेच त्यांचे पती गेल्या पंचवार्षिकला शिरूर ग्रामीण-न्हावरे जिल्हा परिषद गटाचे सदस्य होते. त्यामुळे त्यांनी केलेल्या कामाचा फायदा कविता जगदाळे यांना होईल. त्यामुळे राष्ट्रवादीचे तिकीट मिळण्याची दाट शक्यता आहे. तसेच भारतीय जनता पक्षातून माजी आमदार बाबुराव पाचर्णे यांच्या कुटुंबियातील महिलेला तिकीट मिळण्याची शक्यता वर्तविली जात असल्याने या गटात राष्ट्रवादी विरुद्ध भाजपा अशीच लढत होण्याची शक्यता आहे.
