Vaibhav Suryavanshi Yuvraj Singh IPL 2026: आयपीएल २०२६ च्या हंगामात १५ वर्षीय वैभव सूर्यवंशीने आपल्या फलंदाजीने अवघ्या क्रिकेट विश्वाचे लक्ष वेधून घेतले आहे. राजस्थान रॉयल्सकडून खेळताना त्याने पहिल्याच सामन्यात केलेल्या वादळी खेळीनंतर टीम इंडियाचा माजी दिग्गज युवराज सिंगने वैभवचे तोंडभरून कौतुक केले आहे, मात्र सोबतच एक मोलाचा इशाराही दिला आहे. आयपीएल २०२६ मध्ये चेन्नई सुपर किंग्सविरुद्ध अवघ्या १७ चेंडूत ५२ धावा कुटणाऱ्या वैभव सूर्यवंशीच्या बॅटचा वेग पाहून युवराज सिंग थक्क झाला आहे. नुकत्याच संपलेल्या अंडर-१९ विश्वचषकात भारतासाठी सर्वाधिक धावा करणाऱ्या वैभवमध्ये युवीला भविष्यातील सुपरस्टार दिसत आहे. “वैभवची बॅट फिरवण्याची गती (Bat speed) अविश्वसनीय आहे. खरं सांगायचं तर, माझ्याकडेही तितकी गती नव्हती,” अशा शब्दांत युवीने या युवा खेळाडूची पाठ थोपटली आहे. “पाय जमिनीवर ठेवा”, युवीची सावधगिरीची चेतावणी कौतुक करतानाच युवराजने वैभवला भविष्यासाठी एक गंभीर इशारा दिला आहे. युवी म्हणाला, “वैभवमध्ये अपार क्षमता आहे आणि तो लवकरच टीम इंडियासाठी खेळताना दिसेल. पण, या वयात प्रसिद्धीचं वलय डोक्यात जाऊ न देता त्याने जमिनीवर पाय ठेवणं (Stay grounded) अत्यंत गरजेचं आहे. त्याने आपले मन शांत ठेवले पाहिजे, कारण क्रिकेटमध्ये तेच सर्वात जास्त महत्त्वाचे ठरते.” चांगले चेंडू असूनही वैभवने ज्या प्रकारे ऑफ साईडला षटकार ठोकले, ते पाहून त्याच्याकडे नैसर्गिक प्रतिभा असल्याचे युवराजने मान्य केले. हेही वाचा – Kevin Pietersen Predictions : ‘यंदा RCB, CSK नव्हे तर, हे चार धुरंधर संघ प्लेऑफमध्ये पोहोचणार…!’, माजी खेळाडू केविन पीटरसनचं मोठं भाकीत पहिल्याच सामन्यात चेन्नईचा केला पालापाचोळा – राजस्थान रॉयल्ससाठी सलामीला येणाऱ्या वैभवने यंदाच्या पहिल्या सामन्यातच १२८ धावांच्या लक्ष्याचा पाठलाग करताना चेन्नईच्या गोलंदाजांची पिसं काढली. ४ चौकार आणि ५ गगनचुंबी षटकारांच्या मदतीने त्याने केवळ १५ चेंडूत अर्धशतक पूर्ण केले. त्याच्या या झंझावातामुळे राजस्थानने हे लक्ष्य अवघ्या १२.१ षटकात पूर्ण करत ऐतिहासिक विजय मिळवला. आता युवराजचा हा सल्ला वैभव किती गांभीर्याने घेतो आणि या हंगामात धावांचा डोंगर उभा करतो का, हे पाहणे औत्सुक्याचे ठरेल.
