Arshdeep Singh Engagement : भारताच्या स्टार गोलंदाजाची नवी इनिंग; अर्शदीपने अभिनेत्री समरीनला प्रपोज करत न्यूझीलंडमध्ये उरकला साखरपुडा, फोटो केले शेअर
Arshdeep Singh Engagement : भारतीय वेगवान गोलंदाज अर्शदीप सिंगने त्याची गर्लफ्रेंड समरीन कौरला प्रपोज केल्याचे फोटो सोशल मीडियावर शेअर केले आहेत. हे जोडपे गेल्या काही महिन्यांपासून एकमेकांना डेट करत होते.
Arshdeep Singh Gets Engaged To Samreen Kaur In New Zealand Romantic Proposal Photos : भारतीय क्रिकेट संघाचा स्टार डावखुरा वेगवान गोलंदाज अर्शदीप सिंगने आपल्या आयुष्याची नवी इनिंग सुरू केली आहे. भारत आणि न्यूझीलंड यांच्यात सुरू असलेल्या एकदिवसीय मालिकेदरम्यान अर्शदीपने साखरपुडा उरकला आहे. त्याने आपली गर्लफ्रेंड आणि मॉडेल-अभिनेत्री समरीन कौरला प्रपोज करतानाचे रोमँटिक फोटो सोशल मीडियावर शेअर करून चाहत्यांना सुखद धक्का दिला. न्यूझीलंडच्या निसर्गरम्य वातावरणात अर्शदीपने थेट गुडघ्यावर बसून समरीनच्या बोटात अंगठी घातली.
रोमँटिक अंदाजात प्रपोज; ‘११.११.२०२६’ तारीख ठरली अविस्मरणीय
अर्शदीपने आयुष्यातील या मोठ्या क्षणासाठी न्यूझीलंडची निवड केली. गुडघ्यावर बसून अंगठी घालत त्याने समरीनला लग्नाची मागणी घातली. हे फोटो शेअर करताना दोघांनी भावनिक कॅप्शन लिहिले की, “आयुष्याने आम्हाला दिलेल्या सर्व गोष्टींमध्ये, त्याने आम्हाला एकमेकांना सोपवले ही सर्वात सुंदर भेट आहे. आयुष्यभराच्या साथीसाठी ११.११.२०२६ (हाय मंगेतर).” या पोस्टवर क्रीडा आणि बॉलिवूड जगतातील अनेक सेलिब्रिटींनी शुभेच्छांचा मोठा वर्षाव केला आहे.
धरमशालाचा व्हायरल व्हिडीओ अन् नात्यावर अखेर अधिकृत मोहोर –
View this post on Instagram
अर्शदीप आणि समरीनच्या नात्याची चर्चा गेल्या अनेक महिन्यांपासून माध्यमांमध्ये रंगत होती. सुरुवातीला अर्शदीपने स्नॅपचॅटवर एक फोटो टाकला होता, ज्यात चेहरा न दाखवता केवळ हात पकडल्याचे दिसत होते. त्यानंतर धरमशालाच्या रस्त्यावर दोघे हातात हात घालून फिरताना दिसले, ज्याचा व्हिडीओ तुफान व्हायरल झाला होता. अखेर जुलै महिन्यात दोघांनी सोशल मीडियावर एकत्र फोटो शेअर करत आपल्या प्रेमसंबंधांवर अधिकृत शिक्कामोर्तब केले होते.
कोण आहे समरीन कौर? बॉलिवूड ते पंजाबी गाण्यांचा प्रवास
समरीन कौर मनोरंजन विश्वातील एक प्रसिद्ध चेहरा आहे. ती माजी ‘मिस इंडिया जम्मू-काश्मीर’ राहिली असून अनेक लोकप्रिय पंजाबी म्युझिक व्हिडिओंमध्ये तिने काम केले आहे. याशिवाय, तिने कबीर खान दिग्दर्शित ‘८३’ या चित्रपटात आणि ‘नेल पॉलिश’ या वेबपटातही अभिनय केला आहे. सोशल मीडियावर ती तिच्या स्टायलिश लूकसाठी लोकप्रिय असून आता ती अर्शदीपसोबत विवाहबंधनात अडकणार आहे.
