हे शयनस्थितीतील आसन आहे. ज्यामध्ये शरीराची कमान होते, जी चक्राकार असते. शरीराला चक्राप्रमाणे आकार देणारे म्हणून या आसनाला चक्रासन म्हणतात. जमिनीवर उताणे झोपावे. दोन्ही गुडघे उभे करून पायांचे चवडे मांडीजवळ आणावे अथवा दोन्ही पाय गुडघ्यात वाकवून सीटजवळ उभे करावे. दोन पायांमध्ये साधारणपणे तीन ते चार इंच अंतर घ्यावे. दोन्ही हात उचलून, तळवे उलटे करून डावा हात डाव्या खांद्याजवळ आणि उजवा हात उजव्या खांद्याजवळ न्यावा. हात जास्तीत जास्त आतल्या दिशेने न्यावेत. श्वास घेत कंबर मान उचलावी. खांद्यापासून गुडघ्यापर्यंतचे शरीर हात आणि पायावर तोलून शरीराची कमान करावी. आसन पूर्ण होताच संथ श्वसन करावे. आसन सोडताना सावकाश श्वास घ्यावा. मग श्वास सोडत सोडत हात कोपरात वाकवून व पाय गुडघ्यात वाकवून खांदे, कंबर प्रथम जमिनीला टेकवावे. दोन्ही हात जे खांद्याखाली असतात ते काढावे आणि हाताचे तळवे जमिनीला टेकवावे. दोन्ही पाय शयनस्थितीत न्यावेत. चक्रासनाचे फायदे या आसनात पाठीच्या कण्याची कार्यक्षमता वाढते कारण त्याला उलटा ताण मिळतो. त्यामुळे 33 मणक्यांना चांगला व्यायाम होतो व त्यांची कार्यक्षमता वाढते. तसेच पोटाच्या स्नायूंना ताण मिळतो व पोटातील ग्रंथीवर दाब आल्यामुळे पचनक्रिया सुधारते, अतिरिक्त चरबी घटते. हातापायांच्या स्नायूंना बळकटी येते. मांड्या आणि पोटऱ्यांचे स्नायू लवचिक होतात. या आसनामुळे पाठीच्या कण्याला चांगला ताण बसतो. त्यामुळे तो लवचिक बनतो. त्यामुळे शरीरात उत्साह संचारतो. वृद्धत्व कमी करून तारुण्याचा जोम आणणारे चक्रासन प्रत्येकाने नियमित केले पाहिजे.
