छतरपूर,- देशभरातील प्रसिद्ध धार्मिक स्थळ असलेल्या बागेश्वर धाम येथील अन्नपूर्णा मंदिरामागील एका झाडाला बुधवारी एका ३७ वर्षीय तरुणाचा मृतदेह लटकलेल्या अवस्थेत आढळून आला. राम प्रसाद लोधी असे मृत तरुणाचे नाव आहे. तो मध्य प्रदेशातील कटनी जिल्ह्यातील रहिवासी असल्याचे सांगण्यात येत आहे. पोलिसांनी दिलेल्या माहितीनुसार, रामप्रसाद रविवारी रात्रीपासून बेपत्ता होता. त्याच्या कुटुंबीयांनी कैमूर पोलिस ठाण्यात बेपत्ता झाल्याची तक्रार दाखल केली होती. मृतकाकडून एक सुसाईड नोट सापडली असून, त्यात त्याने कौटुंबिक कलहाचा उल्लेख केला असून त्याला आपले जीवन बालाजीसाठी समर्पित करायचे असल्याचे म्हटले होते. मृत राम प्रसाद यांचा मुलगा बबलू लोधी याने सांगितले त्याचे वडिल जेपी सिमेंटमध्ये काम करत होते, पण काही काळानंतर त्यांनी नोकरी सोडली. घरी किराणा दुकान चालवायला सुरुवात केली. ते सतत चिडचिड करायचे आणि संतापातच असायचे. गेल्या तीन दिवसांपासून कुटुंबीय त्याचा शोध घेत होते. त्यानंतर आज सकाळी बागेश्वर धाम येथून पोलिसांना फोन आला आणि त्यांनी घटनेची माहिती दिली. मिळालेल्या माहितीनुसार, रामप्रसाद लोधी याच्याकडून एक पानाची सुसाईड नोट सापडली असून त्यात त्याने कौटुंबिक गोष्टींचा उल्लेख केला आहे. दरम्यान, ही हत्या आहे की आत्महत्या असा प्रश्नही उपस्थित केला जात आहे.
