Suicide Note – प्रेमाच्या जाळ्यात अडकवून लग्नाचे आमिष दाखवत फसवणूक केल्याच्या मानसिक धक्क्याने फुरसुंगी परिसरात एका तरुण सराफ व्यावसायिकाने दुकानातच गळफास घेऊन आत्महत्या केली. आत्महत्येपूर्वी सराफाने १२ पानी सुसाईड नोट लिहून तरुणीवर गंभीर आरोप केले आहेत. तसेच आत्महत्येमागील कारणांचा उल्लेख केला आहे. प्रतिक राजेंद्र मेमाणे (२९, रा. फुरसुंगी) याने आत्महत्या केली असून त्याचे वडील राजेंद्र मेमाणे यांनी दिलेल्या फिर्यादीवरून तरुणीविरूद्ध गुन्हा दाखल केला आहे. हा प्रकार नोव्हेंबर २०२५ ते ६ मार्च २०२६ या कालावधीत घडल्याचे पोलिसांनी सांगितले. त्यांच्या माहितीनुसार, प्रतीकचे फुरसुंगी येथे शर्वरी ज्वेलर्स नावाचे सोने-चांदी विक्रीचे दुकान आहे. सोशल मीडियाच्या माध्यमातून त्याची तरुणीशी ओळख झाली. पुढे या ओळखीचे प्रेमसंबंधात रूपांतर झाले. तिने लग्नाचे आमिष दाखवत प्रतीककडून ५० हजारांची सोन्याची अंगठी, ड्रेस आदी भेटवस्तू घेतल्या होत्या. तिने स्वतःला कॅन्सर झाल्याचे खोटे सांगितल्याचीही माहिती समोर आली आहे. दरम्यान, प्रतीक लग्नासाठी तयार असतानाही ही तरुणी सतत भेट टाळत होती. यामुळे प्रतीक मानसिक तणावाखाली आला. अखेर हा ताण असह्य झाल्याने त्याने दुकानात गळफास घेऊन आत्महत्या केली. घटनेनंतर सुरुवातीला फुरसुंगी पोलिसांनी अकस्मात मृत्यूची नोंद केली होती. मात्र, तपासात सुसाईड नोट मिळाल्यानंतर तरुणीविरूद्ध आत्महत्येस प्रवृत्त केल्याचा गुन्हा दाखल केला आहे. फसवणुकीने जगण्याची इच्छा हरवली प्रतिकने आत्महत्येपूर्वी लिहिलेल्या सुसाईड नोटमध्ये संबंधित तरुणीवर गंभीर आरोप केले आहेत. फसवणुकीमुळे मानसिक संतुलन ढासळल्याचा उल्लेखही त्याने केला आहे. या नोटमध्ये तो म्हणतो, फसवणूक झाल्यानंतर जगण्याची इच्छा कमी झाली. आई-वडिलांसाठी जगण्याचा प्रयत्न केला, मात्र या धक्क्यातून बाहेर पडता आले नाही. मला ती खूप आवडत होती; पण तिने विश्वासघात केला. आई, वडील आणि ताई मला माफ करा. संबंधित तरुणीला कठोर शिक्षा व्हावी.
