Pune Crime – सिंहगड डेंटल कॉलेजमधील विभागप्रमुख असलेल्या एका ४५ वर्षीय डॉक्टर प्राध्यापकाने राहत्या घरी गळफास लावून आत्महत्या केल्याची घटना शुक्रवारी (दि. ६) घडली. कामाच्या अतिताणामुळे ही आत्महत्या केल्याची प्राथमिक माहिती समोर आली आहे. याप्रकरणी सिंहगड रोड पोलिसांत घटनेची नोंद करण्यात आली आहे. राजू पाटील (४५, रा. पुणे) असे या प्राध्यापकाचे नाव आहे. ते सिंहगड डेंटल कॉलेजमध्ये विभागप्रमुख म्हणून कार्यरत होते. शुक्रवारी (६ मार्च) दुपारी पाटील यांच्या पत्नी घरी आल्यावर त्यांना पती गळफास घेतलेल्या अवस्थेत आढळले. त्यांनी तत्काळ या घटनेची माहिती पोलिसांना दिली. माहिती मिळताच पोलीस निरीक्षक विनय पाटणकर आणि त्यांच्या पथकाने घटनास्थळी धाव घेऊन पंचनामा केला. घटनेचा तपास करीत असताना पोलिसांना घटनास्थळी एक ‘सुसाईड नोट’ सापडली. कामाच्या वाढत्या ताणामुळे आपण हे पाऊल उचलत असल्याचे त्यांनी चिठ्ठीत नमूद केले असल्याची माहिती पोलिसांनी दिली. आत्महत्येमागे केवळ कामाचा ताण हेच एकमेव कारण आहे की आणखी काही याचा तपास पोलिसांकडून सुरू आहे. सिंहगड रोड पोलीस पुढील तपास करीत आहेत.
