चिंबळी : दिवाळीचा सण साजरा करताना पर्यावरणाचे भान राखण्याचा संदेश देत पुणे जिल्हा शिक्षण मंडळाच्या प्राथमिक विद्यालय, मोशी येथे इयत्ता तिसरीच्या विद्यार्थ्यांनी पर्यावरणपूरक आकाशकंदील बनविण्याचा अनोखा उपक्रम राबविला. या उपक्रमातून चिमुकल्यांनी प्लॅस्टिकमुक्त दिवाळीचा संदेश दिला.

विद्यालयाच्या मुख्याध्यापिका सुनीता गवारे यांच्या संकल्पनेतून आणि इयत्ता तिसरीच्या वर्गशिक्षिका सविता गाडेकर यांच्या मार्गदर्शनाखाली हा उपक्रम आयोजित करण्यात आला. यामध्ये सुमारे 70 विद्यार्थ्यांनी उत्स्फूर्त सहभाग घेतला. विद्यार्थ्यांनी बाजारात मिळणार्‍या प्लास्टिकच्या कंदिलांना पर्याय म्हणून घोटीव कागद, जुनी कार्डशीट, नैसर्गिक रंग आणि पुनर्वापर करता येणार्‍या साहित्याचा वापर करून आकर्षक आकाशकंदील तयार केले.

टाकाऊ साहित्याचा कल्पकतेने वापर करत त्यांनी पर्यावरणपूरक सजावटीचा आदर्श घालून दिला. दिवाळी म्हणजे प्रकाशाचा सण; मात्र हा प्रकाश पर्यावरणाला हानी न पोहोचवणारा असावा. प्लास्टिकमुक्त दिवाळीचा धडा आम्ही विद्यार्थ्यांना दिला आहे, असे मुख्याध्यापिका सुनीता गवारे यांनी सांगितले. वर्गशिक्षिका सविता गाडेकर यांनी विद्यार्थ्यांना पर्यावरणपूरक साहित्याचा वापर आणि पुनर्वापराचे महत्त्व समजावून सांगितले. अशा उपक्रमांमुळे लहान वयातच विद्यार्थ्यांमध्ये पर्यावरण संवर्धनाची जाणीव निर्माण होण्यास मदत होत आहे.