खुटबाव : केडगाव ते सुपे राज्य मार्ग क्र. ११८ वरील बोरीपार्धी- चौफुला येथील कालव्यावर नवीन मोठा पूल बांधावा आणि पडवी – सुपे दरम्यानच्या धोकादायक घाट रस्त्याची तातडीने सुधारणा करावी, अशी मागणी आमदार ॲड. राहुल कुल यांनी केली आहे. महत्त्वपूर्ण कामांसाठी त्यांनी सार्वजनिक बांधकाम मंत्री छत्रपती शिवेंद्रसिंहराजे भोसले यांची मंत्रालयात भेट घेऊन चर्चा केली. त्यांना कामांचे लेखी निवेदन दिले.

मंत्री शिवेंद्रसिंहराजे भोसले यांनी दोन्ही मागण्यांना सकारात्मक प्रतिसाद देत सार्वजनिक बांधकाम विभागाच्या पुणे मुख्य अभियंत्यांना आवश्यक ती कार्यवाही करण्याचे आदेश दिले आहेत.
केडगाव- सुपे राज्य मार्ग हा दौंड तालुक्यातील महत्त्वाचा आणि प्रचंड वर्दळीचा मार्ग म्हणून ओळखला जातो. या मार्गावर बोरीपार्धी – चौफुला येथे नवीन मुठा उजव्या कालव्यावर सध्या ३ गाळ्यांचा पूल आहे. मात्र, हा पूल अरुंद असल्याने दोन जड वाहने एकाच वेळी समोरासमोरून जाऊ शकत नाहीत. परिणामी दररोज मोठ्या प्रमाणावर वाहतूक कोंडी होते. अपघातांचे प्रमाणही वाढले आहे.

पुणे- सोलापूर राष्ट्रीय महामार्ग क्रमांक ६५ वर हडपसर ते यवत दरम्यान उन्नत महामार्ग (Flyover Highway) प्रस्तावित आहे. त्याचे काम सुरू झाल्यानंतर राष्ट्रीय महामार्गावरील सर्व वाहतूक केडगाव-सुपे राज्य मार्गावर वळवली जाण्याची शक्यता आहे. त्यामुळे भविष्यातील वाहतुकीचा ताण लक्षात घेता, पुलाचे तातडीने रुंदीकरण करून नवीन मोठा पूल उभारणे गरजेचे असल्याचे आमदार राहुल कुल यांनी निवेदनात ठळकपणे नमूद केले आहे.

पडवी-सुपे घाटातील ‘ब्लॅक स्पॉट’ हटवा

याच मार्गावरील पडवी ते सुपे दरम्यानच्या घाटात तीव्र चढ-उतार आणि धोकादायक वळणे आहेत. वळणांवर रस्त्याचा आवश्यक उतार (सुपर एलिव्हेशन) पुरेसा नसल्याने चढ चढताना जड वाहने मागे घसरतात. अनेकदा चालक विरुद्ध लेनमध्ये जाऊन चढण्याचा प्रयत्न करतात, ज्यामुळे समोरासमोर भीषण अपघात होतात. तीव्र वळणांवर चालकांचा ताबा सुटून वाहने थेट दरीत कोसळल्याच्या शेकडो घटना येथे घडल्या आहेत. त्यामुळे आवश्यक भूसंपादन आणि घाट कटिंग करून या रस्त्याची रचना आणि चढाची तीव्रता (ग्रेडियंट) सुधारण्याचे काम तातडीने हाती घ्यावे, अशी मागणी आमदार कुल यांनी केली.

केडगाव- सुपे मार्गावरील चौफुला पूल आणि पडवी- सुपे घाट हे दोन्ही ठिकाण सध्या नागरिकांच्या जीवितासाठी धोकादायक बनले आहेत. प्रस्तावित उन्नत महामार्गाच्या कामामुळे या मार्गावरील वाहतूक आणखी वाढणार आहे. त्यामुळे नागरिकांचा प्रवास सुरक्षित व्हावा यासाठी ही कामे लवकरात लवकर मंजूर करून ती मार्गी लावण्यासाठी शासनाकडे माझा सातत्याने पाठपुरावा राहील.
– ॲड. राहुल कुल, आमदार.