Pradeep Purnekar case : सप्टेंबर महिन्यातील २९ तारखेला उबाठा गटाचे ठाण्यातील विभाग प्रमुख प्रदीप पुर्णेकर यांची गोळ्या झाडून आणि कोयत्याने वार करून अत्यंत निर्घूनपणे हत्या करण्यात आली होती. या घटनेने ठाणे जिल्हा हादरला. या प्रकरणात पोलिसांनी एकूण पाच आरोपींना अटक केली. त्यांची कसून चौकशी केली जात आहे. अशातच आता या प्रकरणात एक मोठा खुलासा समोर आला आहे.

प्रदीप पुर्णेकर यांचा मुलगा राम पुर्णेकर याने शिंदेसेनेच्या नगरसेविका आणि माजी महापौर मिनाक्षी शिंदे आणि त्यांचे पती राजेंद्र शिंदे यांच्यावर पोलिसांना दिलेल्या जबाबात गंभीर आरोप केले होते. मंगळवारी ठाणे गुन्हे शाखेच्या अधिकाऱ्यांनी मिनाक्षी शिंदे यांचे पती राजेंद्र शिंदे यांची तब्बल नऊ तास चौकशी केली. या चौकशीत त्यांनी प्रदीप पूर्णेकर यांच्या मारेकऱ्यांना ओळखत असल्याची कबुली दिली.

“प्रदीप पूर्णेकर यांच्या हत्येप्रकरणी जे पाच आरोपी अटकेत आहेत, त्यांना मी ओळखतो. माझ्याकडे ते काम मागायला यायचे. माझी पत्नी त्या भागातील ज्येष्ठ नगरसेविका आहे. त्यामुळे आमच्या भेटीगाठी होत असतात. मात्र, प्रदीप पूर्णेकर यांच्या हत्येमध्ये माझा काहीही संबंध नाही.” असा जबाब राजेंद्र शिंदे यांनी पोलिस चौकशीत दिला. आरोपींना समोर बसून चौकशी करण्यात आल्याची माहिती मिळत आहे. या जबाबनुसार पोलिसांकडून तपासाचा वेग वाढला असून कटाचा मुख्य सूत्रधार (मास्टरमाईंड) कोण हे लवकरच समोर येईल असे बोलले जात आहे.

गुणरत्न सदावर्तेंच्या विधानाने चर्चेला उधाण

या हत्या प्रकरणाच्या पार्श्वभूमीवर प्रसिद्ध वकील गुणरत्न सदावर्ते यांच्या विधानानेही राजकीय वर्तुळात खळबळ उडाली आहे. प्रदीप पुर्णेकर यांच्यासाठी न्यायालयीन लढा लढण्याची तयारी असल्याचे ते म्हणाले.

मात्र, या प्रकरणात पुर्णेकर यांच्या बाजूने वकील म्हणून उभे राहण्यास अडथळे निर्माण केले जाऊ शकतात, असा दावा सदावर्ते यांनी केला. तसेच ठाणे जिल्ह्याचे पालकमंत्री एकनाथ शिंदे हेच आपल्या या भूमिकेला विरोध करतील, असे खळबळ उडवून देणारे विधान त्यांनी केले.

नेमकं प्रकरण काय?

२९ सप्टेंबर रोजी रात्री साडेनऊच्या सुमारास ठाण्यातील मनोरमा नगर परिसरात प्रदीप पुर्णेकर यांच्यावर गोळीबार करून आणि कोयत्याने वार करून त्यांची हत्या करण्यात आली होती. या प्रकरणी पोलिसांनी पप्या शिंदे, संतोष कनजिया उर्फ टल्ली, अमित जयकिशन सिंग उर्फ पपलू, निखिल यादव आणि नितेश पवार उर्फ भावड्या या पाच जणांना अटक केली. या हत्येमागील नेमके कारण काय, या गुन्ह्यात आणखी कोणाचा सहभाग आहे का आणि कथित कटामागे मुख्य सूत्रधार कोण आहे, याचा तपास पोलिसांकडून सुरू आहे.

Hindu Temple : अमेरिकेतील हिंदू मंदिरात हत्याकांड घडवण्याचा कट उधळला ; पोलिसांकडून १९ वर्षीय आरोपीला अटक