Eknath Shinde : पुणे शिक्षक मतदारसंघात मोठी घडामोड! शिंदेंच्या शिवसेनेचा अपक्ष उमेदवार सचिन सानप यांना पाठिंबा?
Eknath Shinde : या मतदारसंघातून अपक्ष उमेदवार म्हणून निवडणूक लढवणारे सचिन सानप यांना शिवसेनेकडून पाठिंबा देण्याबाबत चर्चा सुरू असल्याची माहिती समोर आली आहे.
Eknath Shinde : पुणे शिक्षक मतदारसंघाच्या निवडणुकीवरून भाजप आणि एकनाथ शिंदे यांच्या शिवसेनेमध्ये उमेदवारीवरून जोरदार रस्सीखेच झाल्याची पाहायला मिळाली. शिवसेनेच्या वतीने मंगेश चिवटे यांनी उमेदवारी अर्ज दाखल केला होता. मात्र, राजकीय घडामोडीनंतर त्यांनी आपला अर्ज मागे घेतला. यानंतर आता या मतदारसंघातून अपक्ष उमेदवार म्हणून निवडणूक लढवणारे सचिन सानप यांना शिवसेनेकडून पाठिंबा देण्याबाबत चर्चा सुरू असल्याची माहिती समोर आली आहे.
नंदनवन निवासस्थानी महत्त्वाची बैठक
एकनाथ शिंदे यांच्या ठाण्यातील नंदनवन निवासस्थानी पक्षाच्या प्रमुख नेत्यांची बैठक पार पडली. या बैठकीला उदय सामंत, शंभूराज देसाई, प्रकाश आबिटकर, ओमराजे निंबाळकर, भावना गवळी, विजय शिवतारे, शहाजीबापू पाटील, रवींद्र धंगेकर यांच्यासह पक्षाचे आमदार, खासदार आणि इतर महत्त्वाचे नेते उपस्थित होते.
या बैठकीत पुणे शिक्षक मतदारसंघातील अपक्ष उमेदवार सचिन सानप यांना पाठिंबा देण्याबाबत चर्चा झाल्याची माहिती आहे. तसेच या निवडणुकीत पक्षाची भूमिका काय असावी यासंदर्भात एकनाथ शिंदे यांनी नेत्यांना मार्गदर्शन केल्याचे सांगितले जात आहे.
एकनाथ शिंदे नाराज असल्याच्या चर्चांना धंगेकरांचे उत्तर
भाजपने पुणे शिक्षक आणि पदवीधर अशा दोन्ही मतदारसंघात उमेदवार दिल्यानंतर महायुतीतील राजकीय समीकरणांची चर्चा सुरू झाली. या पार्श्वभूमीवर एकनाथ शिंदे नाराज असल्याच्या चर्चांनाही उधाण आले. मात्र, या चर्चांवर प्रतिक्रिया देताना रवींद्र धंगेकर यांनी नाराजीचे वृत्त फेटाळल्याचे सांगितले.
Eknath Shinde Politics
कोण आहेत सचिन सानप?
सचिन सानप हे प्राध्यापक असून, त्यांनी अनेक वर्षांपासून शिक्षकांचे प्रश्न मांडले आहेत. २०२६ च्या पुणे विभाग शिक्षक मतदारसंघाच्या निवडणुकीत ते अपक्ष उमेदवार म्हणून रिंगणात उतरले आहेत. आता पुणे शिक्षक मतदारसंघात शिवसेना अधिकृतपणे कोणती भूमिका जाहीर करते आणि या निर्णयाचा निवडणुकीतील राजकीय समीकरणांवर काय परिणाम होतो, याकडे सर्वांचे लक्ष लागले आहे.
