Yashwant Sugar Factory – थेऊर येथील यशवंत सहकारी साखर कारखान्याच्या जमिनीची अखेर पुणे बाजार समितीने खरेदी केली आहे. कारखान्याने राज्य सरकारच्या परवानगीने विक्रीसाठी ९९.२७ एकर जमिनींपैकी ४९.१८ एकर जमिनीच्या पहिल्या टप्प्यातील जमीन खरेदीचे पहिले खरेदीखत झाले आहे. या खरेदीखताने कारखान्याला १४८ कोटी रुपयांचे भांडवले उभे राहण्याचा मार्ग मोकळा झाला आहे. प्रशासकीय पातळीवरील स्थगिती व पणन विभागाच्या जमीन खरेदीची परवानगी पूर्ण होण्याचे सोपस्कार झाल्यानंतर कारखाना सुरू होण्याचा मार्ग १५ वर्षांनंतर मोकळा झाला आहे.

यशवंत सहकारी साखर कारखान्याच्या उभारणीसाठी गेल्या विधानसभा निवडणुकीत तत्कालीन उपमुख्यमंत्री स्व. अजित पवार यांनी पुणे बाजार समिती व यशवंत सहकारी साखर कारखान्याच्या या अंतर्गत प्रस्तावाला राज्य मंत्रिमंडळ बैठकीत मान्यता दिली होती. या निर्णयानुसार पुणे बाजार समितीला कारखान्याची ९९.२७ एकर जमीन खरेदीची मान्यता दिली होती. त्यानुसार स्थानिक जमिनीचे शासकीय मूल्यांकन होऊन चालू बाजारभावानुसार जमीन खरेदीला राज्य शासनाने मंजुरी दिली होती.

त्यानुसार पुणे बाजार समितीने परवानगी मागितली होती. मात्र, परवानगीला पणन विभागाने स्थगिती दिली होती. त्यानंतर स्व. अजित पवार यांच्या पश्चात उपमुख्यमंत्री सुनेत्रा पवार व खासदार पार्थ पवार यांनी पुणे बाजार समिती व यशवंत कारखाना या संस्थांतील ठरावास बळ दिल्याने राज्य शासनाच्या सर्व मंजुऱ्यांनी पुणे बाजार समितीतर्फे नेमणूक केलेल्या संचालक मंडळातील सभापती प्रकाश जगताप,

संचालक नानासाहेब आबनावे व गणेश घुले यांच्या करवी ४९.१८ एकर जमिनीचे पहिले खरेदी खत पूर्ण केले आहे. कारखान्यातर्फे अध्यक्ष सुभाष जगताप, उपाध्यक्ष किशोर उंद्रे व कार्यकारी संचालक कौलास जरे यांच्या करवी विक्रीला मान्यता दिली आहे. त्यानुसार कारखान्याने गट क्र. ३६, गट क्र. २, गट क्र. ३७, गट क्र. ४१/१ अशा जमिनीचे क्षेत्र पुणे बाजार समितीला विक्री केले आहे.

“पुणे बाजार समितीने या जागेचा प्रश्न व बाजार समितीच्या शिल्लक ठेवींतून ती जागा खरेदी करण्यासाठी पसंती दिली होती. या व्यवहाराने बाजार समितीचा जागेचा प्रश्न व कारखान्याला भाग भांडवल उभारणीचा प्रश्न सुटेल. सर्व प्रशासकीय कायदेशीर प्रक्रिया पूर्ण करून पारदर्शकपणे खरेदीचा व्यवहार पूर्ण केला आहे.”
– प्रकाश जगताप, सभापती, पुणे बाजार समिती