प्रभात वृत्तसेवा
सातारा – जिल्हा परिषदेचे ६५ गट व ११ तालुका पंचायत समित्यांच्या १३० गणांसाठी आज काढण्यात आलेल्या आरक्षण सोडतीत अनेक दिग्गजांना धक्का बसला आहे. जिल्हा परिषद सभागृहातून अनेक मातब्बर बाहेर राहणार असल्याने अनेक गटांत इच्छुकांचा हिरमोड झाला आहे. हायहोल्टेज लढतीचे असणाऱ्या फलटण विधानसभा मतदारसंघात अनेक महत्वाच्या जागा आरक्षित झाल्या आहेत. अनेक गटांत नव्या चेहऱ्यांना संधी मिळणार असल्याने या आरक्षणामुळे ‘कही खुशी कही गम’ अशी परिस्थिती निर्माण झाली आहे.

जिल्हा परिषदेच्या ६५ जागांसाठी सोमवारी जिल्हाधिकारी कार्यालयातील नियोजन भवनात आरक्षण सोडतीची प्रक्रिया जिल्हाधिकारी संतोष पाटील, उपजिल्हाधिकारी (महसूल) विक्रांत चव्हाण यांच्या उपस्थितीत राबवण्यात आली. प्रथम अनुसूचित जातीसाठी आरक्षण काढण्यात आले. यामध्ये खेड (ता. सातारा), सैदापूर (ता. कराड), बरड, साखरवाडी- पिंपळवाडी (महिला), गोंदवले बुद्रुक (महिला), गुणवरे व विडणी( महिला) असे आरक्षण निघाल्याने या गटातील इच्छुकांची गोची झाली.

हिंगणगाव गटात सर्वसाधारण महिला आरक्षण पडल्याने धैर्यशील उर्फ दत्ता अनपट यांची संधी हुकली असली तरी त्यांच्या पत्नी पुन्हा जिल्हा परिषदेत येण्याची शक्यता आहे. फलटण मतदारंसघातील तीन गट आरक्षित झाल्याने हायहोल्टेज लढतींना ब्रेक बसला. अनुसुचित जातीसाठी भिलार (ता. महाबळेश्वर) या गटासाठी आरक्षण निघाले. ही जागा २०१७ मध्ये अनुसूचित जाती महिलेसाठी आरक्षित झाली होती. त्यामुळे निवडणूक आयोगाच्या निर्देशानुसार ही जागा यावेळी पुरुषांसाठी आरक्षित झाली.

नागरिकांच्या मागास प्रवर्गासाठी ६५ पैकी १७ जागा आरक्षित झाल्या. त्यामधील ९ जागांसाठी महिलांना संधी मिळाली. वाठार स्टेशन गट नागरिकांच्या मागास प्रवर्गातील महिलेसाठी राखीव झाल्याने इच्छुकांना धक्का बसला. काले, विंग, कुडाळ, मल्हारपेठ, मारुल हवेली, औंध, बुध, कोडोली हे गट महिलांसाठी राखीव झाले. नागरिकांच्या मागास प्रवर्गासाठी वर्णे, वाठार निंबाळकर, तरडगाव, निमसोड, शिरवळ, मायणी, भुईंज, म्हसवे या गटांत आरक्षण पडले.

सर्वसाधारण प्रवर्गाच्या ४० जागांपैकी २० जागांवर महिलांना संधी मिळाली आहे. ओझर्डे, तारळे, शेंद्रे, बिदाल, वारुंजी, कार्वे, कोपर्डे हवेली, आंधळी, मार्डी, वाठार किरोली, पुसेसावळी, एकंबे, मंद्रुळकोळे, रेठरे बुद्रुक, हिंगणगाव, बावधन, काळगाव, कुसुंबी, सातारारोड, पाटखळ या गटांत महिलाराज दिसणार आहे. जिल्हा परिषदेच्या ६५ पैकी ३३ गटांत महिलाराज दिसणार आहे. अध्यक्षपद महिला प्रवर्गासाठी आरक्षित असल्याने आगामी काळात जिल्हा परिषद सभागृहात महिलांचा वरचष्मा दिसणार आहे.

अध्यक्षपदासाठी आठ गटांत रस्सीखेच..
जिल्हा परिषदेच्या अध्यक्षपदाचे आरक्षण नागरिकांचा मागास प्रवर्गातील महिलेसाठी आरक्षित आहे. सोमवारी झालेल्या आरक्षण सोडतीत औंध, बुध (ता. खटाव), वाठार स्टेशन (ता. कोरेगाव), कुडाळ (ता. जावळी), कोडोली (ता. सातारा), मल्हारपेठ, मारुल हवेली (ता. पाटण), काले, विंग (ता. कराड) या गटात नागरिकांचा मागास प्रवर्गातील महिलेचे आरक्षण जाहीर झाले आहे. त्यामुळे या आठ गटांपैकी कोणत्या गटातील महिला अध्यक्षपदी विराजमान होणार हे आगामी काळातच स्पष्ट होणार आहे.

परत येऊ शकणारे दिग्गज..
दीपाली साळुंखे, सुरेंद्र गुदगे, सागर शिवदास, राजेश पवार, संजीवराजे नाईक निंबाळकर, मनोज पवार, सोनाली पोळ, सुवर्णा देसाई, मंगेश धुमाळ, अरुणादेवी पिसाळ, अर्चना रांजणे, मानसिंगराव जगदाळे, सुनीता कदम, संगीता मस्कर, उदयसिंह पाटील- उंडाळकर.

या दिग्गजांना धक्का..
उदय कबुले, भीमरावकाका पाटील, वसंतराव मानकुमरे, दीपक पवार, वनिता गोरे, शिवाजंलीराजे नाईक निंबाळकर, जिजामाला नाईक निंबाळकर, अरुण गोरे, भारती पोळ, प्रदीप विधाते, कल्पना खाडे, अभय तावरे, अर्चना देशमुख, बापूराव जाधव, रमेश पाटील, निवास थोरात.