नवी दिल्लीः आज दिल्लीच्या महिला मुख्यमंत्री म्हणून रेखा गुप्ता या शपथ घेणार आहेत. यंदाच्या दिल्ली विधानसभेच्या निवडणूकीत भाजपला अभूतपूर्व यश मिळाले. तब्बल २७ वर्षानंतर दिल्ली विधानसभेवर भाजपची सत्ता आली आहे. नवी दिल्ली विधानसभा क्षेत्रातून आपचे सर्वेसर्वा आणि दिल्लीचे माजी मुख्यमंत्री अरविंद केजरीवाल यांना पराभवाची धूळ चारायला लावणारे परवेश शर्मा यांच्या गळ्यात मुख्यमंत्री पदाची माळ पडेल असे सांगितले जात होते. त्यानंतर भाजपमधील अनेक बड्या नेत्यांची मुख्यमंत्री पदासाठी नावे चर्चेत होती. अखेर भाजपने मुख्यमंत्री म्हणून रेखा गुप्ता यांना संधी दिली आहे. यामुळे दिल्लीत महिलाराज पाहिला मिळणार आहे.

चौथ्या महिला मुख्यमंत्री

रेखा गुप्ता दिल्लीच्या शालीमार बाग मतदारसंघातून पहिल्यांदाच आमदार म्हणून निवडून आल्या आहेत आणि त्या भाजप महिला मोर्चाच्या राष्ट्रीय उपाध्यक्षा आहेत. तसेच दिल्लीचे मुख्यमंत्रीपद भूषवणाऱ्या त्या चौथ्या महिला आहेत. याआधी सुषमा स्वराज, शीला दीक्षित आणि आतिशी राजधानी दिल्लीच्या मुख्यमंत्री राहिलेल्या आहेत. मुख्यमंत्रीपदाच्या शर्यतीत अरविंद केजरीवाल यांचा पराभव करणाऱ्या प्रवेश वर्मापासून दिल्लीचे दिग्गज नेते विजेंद्र गुप्ता यांच्यापर्यंत अनेक दिग्गजांची नावे चर्चेत होती. असे असतानाही पक्षाने रेखा गुप्ता यांच्या नावाची मुख्यमंत्री म्हणून निवड केली.

भाजपकडून स्पष्ट संदेश 

वैश्य समाजातून आलेल्या रेखा गुप्ता या मूळच्या हरियाणातील जिंद येथील आहेत. एका महिलेला मुख्यमंत्री करून भाजपने पक्ष आणि सरकारमध्ये महिलांचा सहभाग वाढविण्याचा स्पष्ट संदेश दिला आहे. 13 राज्यात भाजपची सत्ता आहे, मात्र आजपर्यंत पक्षाची एकही महिला मुख्यमंत्री नव्हती. मात्र, यापूर्वी अनेक राज्यांमध्ये भाजपच्या महिला मुख्यमंत्री राहिलेल्या आहेत. रेखा गुप्ता यांना दिल्लीच्या मुख्यमंत्री बनवून भाजप आता महिला मुख्यमंत्र्यांचा वारसा पुढे नेण्याचा प्रयत्न करत आहे.

महिलांना प्राधान्य 

रेखा गुप्ता यांना मुख्यमंत्री करून भाजपने निवडणुकीच्या राजकारणात आणि धोरणांमध्ये महिलांना प्राधान्य देत असल्याचे दाखवण्याचा प्रयत्न केला आहे. 70 सदस्यांच्या दिल्ली विधानसभेच्या निवडणुकीत भाजपने 9 महिलांना उमेदवारी दिली होती. त्यापैकी चार महिला उमेदवार विजयी झाल्या आहेत. त्याच वेळी दिल्लीत 2025 च्या विधानसभा निवडणुकीत पुरुषांपेक्षा महिलांनी जास्त मतदान केले. महिला मतदारांनी 60.92% पुरुषांचे मतदान 60.61% मतदान केले आहे. भाजपने 70 पैकी 48 जागा मिळवून निर्णायक विजय मिळवला आहे. मतदारांना डोळ्यांसमोर ठेवून भाजपने निवडणूक जाहीरनाम्यात दिल्लीतील महिलांना केंद्रस्थानी ठेवून मोठी आश्वासने दिली आहेत. त्याची पूर्तता आगामी काळात भाजपला करावी लागणार आहेत.

नव्या चेहऱ्याला संधी 

रेखा गुप्ता हा नवा चेहरा आहे, कारण त्यांनी संसदीय निवडणूक लढवली नाही आणि नवा चेहरा म्हणून दिल्लीच्या इतिहासात नवा अध्याय लिहिण्यासाठी त्या एक आदर्श मॉडेल आहेत. त्यांना दिल्लीचे मुख्यमंत्री करून भाजपने केवळ वादविरहित राजकारणीच नाही तर एका महिला नेत्याची आणि नव्या चेहऱ्याचीही निवड केली आहे. लोकसभा निवडणुकीपूर्वी भाजपने मध्य प्रदेश, राजस्थान आणि छत्तीसगडमध्येही कनिष्ठ नेत्यांना मुख्यमंत्री केले होते.

भाजपचा मास्टस्ट्रोक

लोकसभा निवडणुकीतील पराभवानंतर भाजपने हरियाणात नायबसिंग सैनी आणि महाराष्ट्रात देवेंद्र फडणवीस यांना मुख्यमंत्री केले, जे या पदाच्या दावेदारांच्या शर्यतीत आघाडीवर होते. दिल्लीतही पक्ष अशाच नेत्याला मुख्यमंत्री करेल, जो आपल्या दावेदारांच्या यादीत अग्रस्थानी असेल. मात्र तसे न करता भाजपने मध्य प्रदेश, राजस्थान आणि छत्तीसगडचा आदर्श स्वीकारत पहिल्यांदाच आमदार म्हणून निवडून आलेल्या ५० वर्षीय रेखा गुप्ता यांची मुख्यमंत्रीपदी नियुक्ती करण्याची घोषणा केली.