देहूरोड, दि. ५ (वार्ताहर) – संत तुकाराम महाराज बीज सोहळ्याच्या दिवशी देहू येथे झालेल्या अपघातात एका ज्येष्ठ महिलेचा दुर्दैवी मृत्यू झाला. काळोखे चौकाकडून गाथा मंदिराकडे जाणाऱ्या बायपास रिंगरोडवर गुरुवारी (दि.५) दुपारी सुमारे सव्वादोन वाजण्याच्या सुमारास पीएमपीएल बसच्या चाकाखाली सापडून त्यांचा जागीच मृत्यू झाला. मिळालेल्या माहितीनुसार, भागीरथी त्र्यंबक विभुते (वय ६७, रा. चिखली) असे मृत्यू झालेल्या महिलेचे नाव आहे. संत तुकाराम महाराज बीज सोहळ्यानिमित्त देहू येथे दर्शन घेऊन त्या आपल्या पतीसोबत दुचाकीवरून परत जात होत्या. भैरवनाथ चौकाकडून काळोखे चौकाकडे जाणाऱ्या बायपास रिंगरोडवरून (दुचाकी क्र. एमएच १४ ईएक्स ९५२७) जात असताना पीएमपीएल बस (एमएच १४ एचयू ५०३७) यांची धडक बसली. या अपघातात त्या बसच्या चाकाखाली सापडल्याने त्यांचा जागीच मृत्यू झाला. या घटनेमुळे परिसरात एकच खळबळ उडाली. बीज सोहळ्यासाठी आलेल्या भाविकांमध्येही हळहळ व्यक्त करण्यात आली. या प्रकरणाचा पुढील तपास देहूरोड पोलीस करीत आहेत.
