Maharashtra Winter Session 2025 | विधिमंडळाचे हिवाळी अधिवेशन सोमवापासून नागपुरात सुरू होणार आहे. शेतकऱ्यांचा असंतोष, आगामी स्थानिक स्वराज्य संस्था निवडणुकांचा दबाव या पार्श्वभूमीवर फक्त एक आठवड्याच्या कालावधीत होत असलेले हे अधिवेशन वादळी ठरण्याची शक्यता आहे. नगर परिषद आणि नगर पंचायत निवडणुकीत राज्य निवडणूक आयोगाने घातलेला घोळ, उपमुख्यमंत्री अजित पवार यांचे पुत्र पार्थ यांच्याशी संबंधित मुंढव्यातील बेकायदा जमीन खरेदी, मंत्री संजय शिरसाट यांच्यावरील सिडको जमीन घोटाळ्याचा कथित आरोप, साताऱ्यातील डॉ. संपदा मुंडे आत्महत्या प्रकरणात भाजपच्या नेत्यांवर होत असलेले आरोप विरोधक लावून धरण्याची शक्यता आहे. शेतकरी प्रश्न केंद्रस्थानी राहण्याची शक्यता याशिवाय अधिवेशनात शेतकरी प्रश्न पुन्हा एकदा केंद्रस्थानी राहण्याची शक्यता आहेत. कापूस आणि सोयाबीनला मिळणारा अल्प भाव, बाजारात करण्यात आलेल्या कृत्रिम दर कपातीचे आरोप, अतिवृष्टी आणि नैसर्गिक आपत्तीमुळे नुकसान झालेल्या शेतकऱ्यांना मदत मिळण्यास झालेला विलंब या मुद्द्यांवरून विरोधक सरकारला जाब विचारतील. महायुती सरकारची वर्षपूर्ती झाली. वर्षभरात केलेल्या कामांचा, घेतलेल्या निर्णयांचा लेखाजोखा घेऊन सरकार सभागृहात विरोधकांवर वरचढ होण्याची शक्यता आहे. सध्या दोन्ही सभागृहांत विरोधी पक्षनेता नाही. यामुळे दुखावलेले विरोधक ताकदीने एकत्र आले आहेत. Maharashtra Winter Session 2025 | निवडणुकांची छाप अधिवेशनावर राज्यात महापालिकांसह जिल्हा परिषद व पंचायत समितीच्या निवडणुका लवकरच होण्याची शक्यता असल्याने या निवडणुकांची छाप अधिवेशनावर राहील. प्रत्येक राजकीय पक्ष आपली भूमिका मजबूत करण्याच्या प्रयत्नात असून, सभागृहातील प्रत्येक मुद्द्यावरून राजकीय संघर्ष अधिक तीव्र होण्याची शक्यता आहे. दुसरीकडे, नाशिकच्या तपोवनातील वृक्षतोडीचा मुद्दा सभागृहात तापण्याची शक्यता आहे. या अधिवेशनाच्या पूर्वसंध्येला आज सरकारने आयोजित केलेल्या चहापान कार्यक्रमावर विरोधी पक्षांनी बहिष्कार टाकला आहे. सरकारच्या चहापानावर बहिष्कार टाकल्याचे स्पष्टीकरण देताना नेते भास्कर जाधव यांनी आपली भूमिका मांडली. Maharashtra Winter Session 2025 | हेही वाचा: Satara : सुशिक्षित बेरोजगारांना रोजगार मिळवून देण्यासाठी प्रयत्नशील : गायत्रीदेवी पंतप्रतिनिधी
