नवी दिल्ली  – विविध उद्योगाच्या दृष्टिकोनातून महत्त्वाच्या असलेल्या वस्तूंची निर्यात एकाच देशाकडून करणे योग्य होणार नाही. अशा परिस्थितीत रेअर अर्थ मॅग्नेटसह महत्त्वाच्या वस्तूंच्या पुरवठ्यासाठी पर्यायी स्त्रोत विकसित करण्यासाठी उद्योजकांची संघटना प्रयत्न करत आहे. असोचेम या संघटनेने सांगितले की, केंद्र सरकारबरोबरच उद्योजकांची संघटनाही रेअर अर्थ मॅग्नेट संदर्भात विविध देशांच्या संपर्कात आहे.

करोनाच्या काळात इलेक्ट्रॉनिक्स उपकरणासाठी आवश्यक सेमीकंडक्टरचा तुटवडा निर्माण झाला होता. त्यामुळे विविध क्षेत्रातील उत्पादनावर नकारात्मक परिणाम झाला होता. हा पेच काही प्रमाणात संपुष्टात आल्यानंतर आता रेअर अर्थ मॅग्नेटचा पुरवठा मर्यादित झाला आहे. त्यामुळे वाहन उद्योगासह इतर विविध उद्योगांच्या उत्पादकतेवर परिणाम होत आहे.

असा प्रकार भविष्यात होऊ नये यासाठी सेमीकंडक्टर आणि मॅग्नेटसह इतर आवश्यक घटकांची आयात एकाच देशाऐवजी विविध देशांकडून करण्यासाठी प्रयत्न करण्यात येत आहे. संबंधित उत्पादने जास्तीत जास्त प्रमाणात देशातच उपलब्ध होतील यासाठी प्रयत्न करण्यात येत असल्याचे असोचेमचे अध्यक्ष निर्मल के मिंडा यांनी सांगितले.

या पदावर निवड झाल्यानंतर पत्रकाराशी बोलताना ते म्हणाले की, आम्ही विविध उद्योगांकडून या संदर्भातील माहितीचे संकलन करीत आहोत. त्या आधारावर पुढील कार्यवाही करण्यात येणार आहे. त्या माहितीच्या आधारावर विविध वस्तूंसाठी आगामी काळामध्ये काय उपाययोजना करता येतील, यासंदर्भात अहवाल केंद्र सरकारकडे सादर करण्यात येईल.

ही उत्पादने देशात विकसित व्हावीत याकरीता काय धोरण असावे किंवा अनुदान देण्याची गरज आहे का या संदर्भात अहवालात माहिती देण्यात येईल. अमेरिका आणि भारतादरम्यान व्यापार विषयक मतभेद निर्माण झाले आहेत, ते लवकर निवळतील आणि दोन्ही देशांदरम्यान सर्वसमावेशक व्यापार करार होईल अशी अपेक्षा त्यांनी व्यक्त केली. अमेरिकेच्या निर्णयाचा भारतातील काही क्षेत्रावर नकारात्मक परिणाम होत असल्याचे त्यांनी मान्य केले.