नवी दिल्ली – ओला इलेक्ट्रिक या कंपनीने देशांतर्गत संशोधन करून रेअर अर्थ मॅग्नेट शिवाय वाहनाचे इंजिन यशस्वीरित्या विकसित केले आहे. केंद्र सरकारकडून यासंदर्भात प्रमाणपत्र मिळालेली ओला ही पहिली कंपनी ठरली आहे.

चीनने रेअर अर्थ मॅग्नेट पुरवठा बंद केल्यानंतर भारतातील वाहन आणि इलेक्ट्रॉनिक उद्योगासमोर प्रश्न निर्माण झाला होता. त्यानंतर या कंपनीने रेअर अर्थ मॅग्नेट शिवाय इंजिन विकसित करण्यावर भर दिला. त्यामुळे आता भारतीय वाहन उद्योगाला इतरांवर अवलंबून राहावे लागणार नाही.

ओलाने विकसित केलेल्या या फेराइट इंजिनची तामिळनाडू येथील ग्लोबल ऑटोमोटीव्ह रिसर्च सेंटरने काटेकोर तपासणी केली आहे. त्यानंतर हे इंजिन वाहनासाठी योग्य असल्याचे प्रमाणपत्र दिले आहे. ही माहिती केंद्रीय रस्ते वाहतूक मंत्रालयाने जारी केली.

7 किलो वॅट आणि 11 किलो वॅट क्षमतेच्या इंजिनाची तपासणी केली असता ही इंजिन इलेक्ट्रिक वाहनासाठी सुयोग्य असल्याचे आढळून आले. रेअर अर्थ मॅग्नेटचा वापर करून तयार केलेल्या इंजिनाइतकीच ओलाच्या इंजिनाची क्षमता तर आहेच त्याचबरोबर या इंजिन निर्मितीचा खर्च कितीतरी कमी आहे. शिवाय यासाठी भारताला इतर कोणत्याही देशावर अवलंबून राहावे लागणार नाही.

ऑगस्ट महिन्यात कंपनीने संकल्प 2025 या कार्यक्रमात असे इंजिन विकसित करणार असल्याचे सांगितले होते. त्यानंतर विक्रमी वेळेत या कंपनीने पर्यायी इंजिन विकसित केले आहे. आता ओला कंपनी आपल्या विविध वाहनात या नव्या इंजिनाचा उपयोग करणार आहे. यामुळे या वाहनांची कार्यक्षमता वाढणार आहे. त्याचबरोबर ही वाहने इतर वाहनांपेक्षा स्वस्त राहणार आहेत. शिवाय निसर्गासाठी ही वाहने उपयुक्त ठरणार असल्याचे कंपनीने स्पष्ट केले.