प्रभात वृत्तसेवा बारामती ( प्रमोद ठोंबरे ) – बहुप्रतिक्षित नगरपरिषद निवडणूकीचा बिगुल वाजल्यानंतर बारामतीत आता इच्छुकांची लगबग सुरु झाली आहे. तब्बल नऊ वर्षांच्या कालखंडानंतर नगरपरिषद निवडणूक होत असल्याने इच्छुकांची संख्याही यंदा लक्षणीय असून नगराध्यक्षपद खुल्या प्रवर्गात असल्याने नगराध्यक्षपदासाठी यंदा मोठी चुरस पाहायला मिळणार आहे. नगराध्यक्षपदासाठी अनेकांनी कंबर कसली असून अजित पवार हे नवीन जुन्या चेहऱ्याला संधी देणार की नवीन चेहरा समोर आणणार, याकडे बारामती शहरासह तालुक्याचे लक्ष लागून राहिले आहे. गेल्या अनेक वर्ष राष्ट्रवादी काँग्रेस अजित पवार गटाचे बारामती नगर परिषदेवर निर्विवाद वर्चस्व आहे. विकासाचा पॅटर्न म्हणून बारामती नगरपरिषदेचा राज्यात नावलौकिक आहे. अशा नगरपरिषदेवर नगराध्यक्ष म्हणून काम करण्याची संधी मिळावी, यासाठी अनेकांचे प्रयत्न सुरू झाले आहेत. यामध्ये माजी नगरसेवक नगराध्यक्षांचा समावेश आहे. आचारसंहिता जाहीर झाल्यापासून हालचालींना वेग आला आहे. उपमुख्यमंत्री अजित पवार यांच्याशी जवळीक साधत नगराध्यक्षपदासाठी आपण कसे लायक आहोत, हे सिद्ध करण्याची स्पर्धा सुरू झाली आहे. त्यासाठी गाठीभेटींचे सत्र सुरू झाले असून यावेळी आपणच नगराध्यक्ष होणार ही भावना जनमानसात रुजवण्याचे काम सुरू झाले आहे. त्यासाठी भेटींचे सत्र सुरू झाले आहे. मुंबई- बारामती वारी सुरू.. नगराध्यक्ष पदाच्या उमेदवारीसाठी स्पर्धा जास्त असल्याने आपला पत्ता कट होऊ नये याची पूरेपूर दक्षता घेतली जात जात आहे. या उमेदवारीसाठी इच्छुकांनी आटोकाट प्रयत्न सुरू केले आहेत. अजित पवार यांची मेहरबानी मिळविण्यासाठी नाना उपाय योजले जात आहेत. उपमुख्यमंत्री अजित पवार हे बारामती दौऱ्यावर आल्यानंतर पदाधिकारी, कार्यकर्त्यांच्या गराड्यात व्यस्त असतात. त्यांच्याकडे बोलताना मर्यादा येत असल्याने काही इच्छुक उमेदवारांनी बारामती- मुंबई वाऱ्या सुरू केल्या आहेत. मुंबईत पवार यांची वेळ घेऊन उमेदवारीसाठी साकडे घातले जात आहे. तीन ते चार दिवसांत अजित पवार हे बारामतीत येण्याची शक्यता असून त्यानंतर चित्र स्पष्ट होईल, असे राजकीय वर्तृळातून सांगण्यात आले. नगराध्यक्षपदासाठी चर्चेतील चेहरे.. पाच वर्षांसाठी नगराध्यक्षपदाच्या थेट लढतीतून अजित पवार यांच्या राष्ट्रवादीकडून जय पवार, किरण गुजर, सचिन सातव, शिवाजीराव कदम, जय पाटील, सुभाष सोमानी, धनसिंग ऊर्फ बबलू देशमुख, संजय संघवी यांच्या नावाची चर्चा बारामतीच्या राजकीय वर्तुळात सुरू आहे. हे सर्व इच्छुक उमेदवार तुल्बळ आणि मास लीडर आहेत. त्यांच्या गाऊड लेव्हलला जमेच्या बाजू आहेत. त्यामुळे ते आक्रमक, आग्रही मागणी पक्षश्रेष्ठींकडे मांडू शकतात. इच्छुक उमेदवारांना जनाधार असल्याने ते शेवटपर्यंत उमेदवारीसाठी खिंड लढवतील, अशी अटकळ बांधली जात आहे.
